തിരുവനന്തപുരം: യുവതിയുടെ ബലാൽസംഗ പരാതിയിൽ പ്രതിസ്ഥാനത്ത് നിൽക്കുന്ന എംഎൽഎ രാഹുൽ മാങ്കൂട്ടത്തിൽ 'സിപിഎമ്മിന്റെ രാഷ്ട്രീയ ഗൂഢാലോചനയുടെ ഇരയാണ്' എന്ന് കോൺഗ്രസ് മുഖപത്രമായ വീക്ഷണം. കോൺഗ്രസ് നേതാക്കൾ പരസ്യമായി ഈ വിഷയത്തിൽ മൗനം പാലിക്കുകയും ചിലർ തള്ളിപ്പറയുകയും ചെയ്യുമ്പോൾ, മുഖപത്രത്തിലെ ലേഖനം രാഹുലിന് പൂർണ്ണ പിന്തുണ നൽകുന്ന നിലപാടാണ് സ്വീകരിച്ചിരിക്കുന്നത്.(Victim of CPM's political conspiracy, Congress mouthpiece extends full support to Rahul Mamkootathil)
പാലക്കാട് ഉപതിരഞ്ഞെടുപ്പിൽ എൽഡിഎഫിനെയും ബിജെപിയെയും ചരിത്ര ഭൂരിപക്ഷത്തിൽ പരാജയപ്പെടുത്തിയതാണ് രാഹുൽ ചെയ്ത 'കുറ്റം' എന്നാണ് മുഖപത്രത്തിന്റെ പ്രധാന വാദം. രാഹുലിന്റെ തലമുറയിൽപ്പെട്ട, രാഷ്ട്രീയ സർഗാത്മകതയും പ്രജ്ഞാശേഷിയുമുള്ള ചെറുപ്പക്കാർ കോൺഗ്രസിൽ വളർന്നുവരുന്നത് സിപിഎമ്മിന് ഭീതി ഉണ്ടാക്കിയിരിക്കുകയാണ്. ഇത് സിപിഎമ്മിനെ 'ഗോത്രഹത്യയിലേക്ക്' എടുത്തെറിയുമെന്ന് അവർ തിരിച്ചറിഞ്ഞതായും ലേഖനം ആരോപിക്കുന്നു.
അപവാദങ്ങളിൽ പതറാതെയും വ്യക്തിഹത്യകളിൽ തളരാതെയും ജാഗ്രതയോടെ മുന്നോട്ട് പോകാൻ രാഹുലിനോട് മുഖപത്രം ആഹ്വാനം ചെയ്യുന്നുണ്ട്. അതിനിടെ, ബലാൽസംഗക്കേസ് വന്നതിന് പിന്നാലെ ഒളിവിലുള്ള രാഹുൽ മാങ്കൂട്ടത്തിൽ പാലക്കാട്ടെ ഒരു രഹസ്യ കേന്ദ്രത്തിലേക്ക് മാറിയെന്നാണ് പോലീസിന് ലഭിക്കുന്ന സൂചന. സംസ്ഥാനം വിട്ടെന്ന വാർത്തകൾ പുറത്തുവന്നിരുന്നെങ്കിലും, നിലവിൽ എംഎൽഎ പാലക്കാട് ജില്ലയിൽ തന്നെ തുടരുകയാണ്.
പാലക്കാട് ജില്ല വിടുന്നത് മുൻകൂർ ജാമ്യാപേക്ഷയെ ദോഷകരമായി ബാധിച്ചേക്കാം എന്ന നിയമോപദേശം രാഹുലിന് ലഭിച്ചതായി സൂചനയുണ്ട്. വെള്ളിയാഴ്ച രാവിലെ കുറഞ്ഞ സമയത്തേക്ക് മൊബൈൽ ഫോൺ ഓൺ ചെയ്തത് അഭിഭാഷകനുമായി മുൻകൂർ ജാമ്യഹർജിയുമായി ബന്ധപ്പെട്ട് സംസാരിക്കാനായിരുന്നു. ഇതിനുശേഷം ഫോൺ വീണ്ടും ഓഫ് ചെയ്യുകയായിരുന്നു.
എംഎൽഎയുടെ ഔദ്യോഗിക വാഹനം താമസിക്കുന്ന ഫ്ലാറ്റിൽ ഉണ്ടെങ്കിലും, സുഹൃത്തിന്റെ വാഹനത്തിലാണ് രാഹുൽ ഒളിവിൽ പോയതെന്നാണ് വിവരം. കേസിലെ അന്വേഷണം ശക്തമാക്കിയ പോലീസ് ഇന്ന് മുതൽ പ്രധാന സാക്ഷിമൊഴികൾ രേഖപ്പെടുത്തി തുടങ്ങും. ഗർഭഛിദ്രത്തിനായി ഗുളിക കഴിച്ചതിനെ തുടർന്ന് ആരോഗ്യപ്രശ്നങ്ങളുണ്ടായ പരാതിക്കാരിയെ ചികിത്സിച്ച ഡോക്ടറുടെ മൊഴി ഇന്ന് രേഖപ്പെടുത്തും.
ഇന്നലെ പരാതിക്കാരിയുടെ രഹസ്യമൊഴി രേഖപ്പെടുത്തുകയും വൈദ്യപരിശോധന പൂർത്തിയാക്കുകയും ചെയ്തിരുന്നു. രാഹുൽ നൽകിയ മുൻകൂർ ജാമ്യാപേക്ഷ തിങ്കളാഴ്ച തിരുവനന്തപുരം ജില്ലാ സെഷൻസ് കോടതി പരിഗണിക്കും. രാഹുൽ മാങ്കൂട്ടത്തിൽ നൽകിയ മുൻകൂർ ജാമ്യാപേക്ഷയിൽ പീഡനാരോപണം പൂർണ്ണമായും നിഷേധിക്കുകയാണ്. പരാതി നൽകിയ യുവതിയുമായി ദീർഘകാലമായി സൗഹൃദ ബന്ധമുണ്ടായിരുന്നതായും, ബലാത്സംഗം ചെയ്യുകയോ ഗർഭഛിദ്രത്തിന് നിർബന്ധിക്കുകയോ ചെയ്തിട്ടില്ലെന്നും ഹർജിയിൽ പറയുന്നു. യുവതിയുടെ ആരോപണങ്ങൾ കെട്ടിച്ചമച്ചതാണെന്നും, പോലീസിന്റെ അതിവേഗ നീക്കത്തിന് പിന്നിൽ രാഷ്ട്രീയ നീക്കമുണ്ടെന്നും ഹർജിയിൽ രാഹുൽ ആരോപിക്കുന്നുണ്ട്. അന്വേഷണവുമായി സഹകരിക്കാൻ തയ്യാറാണെന്നും ഹർജിയിൽ വ്യക്തമാക്കിയിട്ടുണ്ട്.