കണ്ണൂർ: പേരിയ-നെടുംപൊയിൽ ചുരത്തിൽ കാറിലിടിച്ച് ട്രാവലർ നിയന്ത്രണം വിട്ട് താഴ്ചയിലേക്ക് മറിഞ്ഞ് നിരവധി പേർക്ക് പരിക്ക്. ഇന്ന് ഉച്ചയ്ക്ക് ശേഷമാണ് അപകടമുണ്ടായത്. ട്രാവലറിൽ ഉണ്ടായിരുന്ന 12 പേർക്കാണ് പരിക്കേറ്റത്.(Traveller overturns into a creek at Nedumpoyil pass, 12 injured)
അപകടം നടന്ന ഉടൻ നാട്ടുകാരും അതുവഴിയെത്തിയ യാത്രക്കാരും ചേർന്ന് പരിക്കേറ്റവരെ രക്ഷപ്പെടുത്തി. ഇവരെ പേരാവൂരിലെ സ്വകാര്യ ആശുപത്രികളിൽ പ്രവേശിപ്പിച്ചു. പരിക്കേറ്റ ആരുടെയും നില ഗുരുതരമല്ല എന്നാണ് വിവരം.
ചുരം റോഡിലെ 28-ാം മൈൽ സെമിനാരി വില്ലക്ക് സമീപത്തുവെച്ചാണ് അപകടം നടന്നത്. വയനാട്ടിലേക്ക് പോവുകയായിരുന്ന കാറും എതിരെ വന്ന ട്രാവലറും കൂട്ടിയിടിച്ചതിനെ തുടർന്ന് ട്രാവലർ നിയന്ത്രണം വിട്ട് താഴ്ചയിലേക്ക് മറിയുകയായിരുന്നു.
കൊട്ടിയൂർ-പാൽചുരം റോഡിൽ ഗതാഗത നിയന്ത്രണം ഉള്ളതിനാൽ നെടുംപൊയിൽ ചുരത്തിൽ ഇന്ന് വലിയ തിരക്ക് അനുഭവപ്പെട്ടിരുന്നു. കൊക്കയിലേക്ക് മറിഞ്ഞ ലോറി പുറത്തെടുക്കുന്നതിൻ്റെ ഭാഗമായിട്ടാണ് ഇന്ന് ഗതാഗത നിയന്ത്രണം ഏർപ്പെടുത്തിയത്. ഈ തിരക്കിനിടെയാണ് അപകടം സംഭവിച്ചത്.