ഇടുക്കി: മൂന്നാറിന് സമീപം ആനച്ചാലിലെ സ്വകാര്യ സ്കൈ ഡൈനിങ് കേന്ദ്രത്തിൽ ക്രെയിനിന്റെ സാങ്കേതിക തകരാർ കാരണം വിനോദസഞ്ചാരികൾ കുടുങ്ങി. ഒന്നരമണിക്കൂറിലധികമായി സഞ്ചാരികളും ജീവനക്കാരുമുൾപ്പെടെയുള്ളവർ കുടുങ്ങിക്കിടക്കുകയാണ്. സഞ്ചാരികളും ജീവനക്കാരുമുൾപ്പെടെ 5 പേരാണ് സ്കൈ ഡൈനിങ്ങിൽ ഉള്ളതെന്നാണ് ഔദ്യോഗിക വിശദീകരണം. എന്നാൽ ഇതിൽ കൂടുതൽ പേരുണ്ടെന്ന് പ്രദേശവാസികൾ പറയുന്നുണ്ട്.(Tourists stuck at Sky Dining in Idukki for 2 hours)
സാഹസിക ടൂറിസത്തിന്റെ ഭാഗമായി അടുത്തിടെ ആനച്ചാലിൽ ആരംഭിച്ച ഈ സ്കൈ ഡൈനിങ്, ക്രെയിൻ ഉപയോഗിച്ച് ഏകദേശം 120 അടി ഉയരത്തിൽ എത്തിച്ചാണ് ഭക്ഷണം കഴിക്കാൻ സൗകര്യമൊരുക്കുന്നത്. ഒരേ സമയം 15 പേർക്ക് ഇരിക്കാനുള്ള സൗകര്യമുണ്ട്. ക്രെയിനിന്റെ സാങ്കേതിക തകരാർ മൂലം പ്ലാറ്റ്‌ഫോം താഴ്ത്താൻ കഴിയാത്തതാണ് നിലവിലെ പ്രശ്നം. കുടുങ്ങിയവരെ വടം ഉപയോഗിച്ച് താഴെ എത്തിക്കാനുള്ള നീക്കമാണ് നടക്കുന്നത്. അടിമാലിയിൽ നിന്നും മൂന്നാറിൽ നിന്നും ഫയർഫോഴ്സ് സംഘം രക്ഷാദൗത്യത്തിനായി സംഭവസ്ഥലത്തേക്ക് പുറപ്പെട്ടിട്ടുണ്ട്.
റോപ്പും സീറ്റ് ബെൽറ്റും ഉൾപ്പെടെയുള്ള സുരക്ഷാ സൗകര്യങ്ങൾ ഉള്ളതിനാൽ നിലവിൽ അപകടത്തിനുള്ള സാധ്യതയില്ലെന്നാണ് അധികൃതർ വ്യക്തമാക്കുന്നത്.