തിരുവനന്തപുരം: രാഹുൽ മാങ്കൂട്ടത്തിൽ എം.എൽ.എയുമായി ബന്ധപ്പെട്ട ബലാത്സംഗക്കേസിൽ യുവതിയുടെ അഭിഭാഷകൻ കോടതിയിൽ ഉന്നയിച്ച വാദങ്ങൾ തള്ളി കോൺഗ്രസ് നേതാവ് സന്ദീപ് വാര്യർ രംഗത്ത്. യുവതിയുടെ വിവാഹബന്ധം നാല് ദിവസം മാത്രമേ നീണ്ടുനിന്നുള്ളൂ എന്ന് അഭിഭാഷകൻ കോടതിയിൽ പറഞ്ഞത് തെറ്റാണെന്നും, അവർ ഇപ്പോഴും വിവാഹമോചിതരല്ലെന്നും സന്ദീപ് വാര്യർ ഫേസ്ബുക്കിലൂടെ വ്യക്തമാക്കി. താൻ യുവതിയുടെ വിവാഹത്തിൽ പങ്കെടുത്ത വ്യക്തിയാണെന്നും അദ്ദേഹം അറിയിച്ചു.(They are still not divorced, Sandeep Varier on Rahul Mamkootathil issue)
യുവതിയുടെ മൊഴിയെയും രാഹുൽ മാങ്കൂട്ടത്തിലിന്റെ ജാമ്യാപേക്ഷയെയും ചുറ്റിപ്പറ്റിയുള്ള വിവാദങ്ങൾക്കിടെയാണ് കോൺഗ്രസ് നേതാവിന്റെ വെളിപ്പെടുത്തൽ. "അവരുടെ വിവാഹ ബന്ധം നാലുദിവസം മാത്രമേ നീണ്ടു നിന്നുള്ളൂ എന്ന് കോടതിയിൽ പെൺകുട്ടിയുടെ അഭിഭാഷകൻ ഉന്നയിച്ച വാദം ശരിയല്ല. മാസങ്ങളോളം അവർ തിരുവനന്തപുരത്ത് ഒരുമിച്ച് ഉണ്ടായിരുന്നു. ഇത് സത്യമാണ്. ഇതെനിക്കറിയാവുന്നതാണ്. മാത്രമല്ല, അവർ ഇപ്പോഴും വിവാഹമോചിതരല്ല. ഗുരുവായൂരിൽ താലികെട്ടിയതാണ്," അദ്ദേഹം കൂട്ടിച്ചേർത്തു.
അറിയാവുന്ന സത്യങ്ങൾ പുറത്തുപറഞ്ഞില്ലെങ്കിൽ കുറ്റബോധം വേട്ടയാടുമെന്നും അതുകൊണ്ടാണ് തുറന്നുപറയുന്നതെന്നും അദ്ദേഹം ഫേസ്ബുക്ക് പോസ്റ്റിൽ കൂട്ടിച്ചേർത്തു. വിവാഹബന്ധം ഒഴിഞ്ഞ ശേഷമാണ് രാഹുലിനെ പരിചയപ്പെട്ടതെന്ന് യുവതി അന്വേഷണ സംഘത്തിന് മൊഴി നൽകിയതായി റിപ്പോർട്ടുണ്ടായിരുന്നു. ഈ മൊഴിയെയാണ് സന്ദീപ് വാര്യർ എതിർക്കുന്നത്.
വിവാഹിതയായ യുവതിയുടെ ഗർഭത്തിന് ഉത്തരവാദി താനല്ലെന്നും, അത് അവരുടെ ഭർത്താവാണെന്നും രാഹുൽ മാങ്കൂട്ടത്തിൽ മുൻകൂർ ജാമ്യാപേക്ഷയിൽ വാദിച്ചിരുന്നു. ഗർഭച്ഛിദ്രം അവരുടെ സ്വന്തം ഇഷ്ടപ്രകാരമാണ് ചെയ്തതെന്നും രാഹുൽ കോടതിയിൽ അറിയിച്ചിരുന്നു. അതേസമയം, ആരോപണവുമായി ബന്ധപ്പെട്ട് കോൺഗ്രസ് പാർട്ടി സ്വീകരിച്ച നിലപാടിനൊപ്പമാണ് താനെന്നും സന്ദീപ് വാര്യർ പോസ്റ്റിൽ വ്യക്തമാക്കി.