തിരുവനന്തപുരം: രാഹുൽ മാങ്കൂട്ടത്തിൽ എം.എൽ.എ.യുടെ വിഷയത്തിൽ കോൺഗ്രസ് മുഖപത്രമായ 'വീക്ഷണ'ത്തിൽ വന്ന മുഖപ്രസംഗത്തോട് പ്രതികരിച്ച് മുതിർന്ന കോൺഗ്രസ് നേതാവ് കെ. മുരളീധരൻ. രാഹുലിനെ ന്യായീകരിക്കാൻ പാർട്ടി തയ്യാറല്ലെന്നും, മുഖപ്രസംഗം സി.പി.എമ്മിന്റെ ഇരട്ടത്താപ്പിനുള്ള മറുപടിയാണെന്നും അദ്ദേഹം വ്യക്തമാക്കി.(There is no justification for Rahul Mamkootathil, editorial is a reply to CPM, says K Muraleedharan)
'പാപം ചെയ്യാത്തവർ കല്ലെറിയട്ടെ' എന്ന തലക്കെട്ടോടെ വന്ന മുഖപ്രസംഗം സി.പി.എമ്മിനെയും എൽ.ഡി.എഫിനെയും ഉദ്ദേശിച്ചുള്ളതാണെന്ന് മുരളീധരൻ പറഞ്ഞു. നടൻ മുകേഷിനെപ്പോലെ ഒരാളെ സംരക്ഷിച്ച പാർട്ടി, രാഹുൽ മാങ്കൂട്ടത്തിലിന്റെ വിഷയം വരുമ്പോൾ ധാർമികത പറയുന്നതിന്റെ തെറ്റുകൾ ചൂണ്ടിക്കാണിക്കുക മാത്രമാണ് മുഖപ്രസംഗം ചെയ്തത്.
"രാഹുലിനെ ന്യായീകരിക്കേണ്ട ഒരാവശ്യവും പാർട്ടിക്കില്ല. രാഹുലിനെ ആരോപണം വന്നയുടൻ പുറത്താക്കിയിട്ടുണ്ട്. എന്നാൽ, അതിന്റെ പേരിൽ ഉപദേശിക്കാൻ വരുന്നവർക്ക് അതിനുള്ള അവകാശമില്ല. സ്വർണ്ണക്കൊള്ള മറച്ചുവെക്കാൻ രാഹുൽ വിഷയം ഉയർത്തിക്കാണിച്ചാൽ അതേ രീതിയിൽത്തന്നെ പ്രതിരോധിക്കും," മുരളീധരൻ കൂട്ടിച്ചേർത്തു. "രാഹുൽ ചെയ്തതും മുകേഷ് ചെയ്തതും തെറ്റാണ്. സ്ത്രീകളുടെ മേൽ ആര് അതിക്രമം നടത്തിയാലും തെറ്റാണ്," എന്നും അദ്ദേഹം വ്യക്തമാക്കി.
രാഹുൽ മാങ്കൂട്ടത്തിൽ രാഷ്ട്രീയ ഗൂഢാലോചനയുടെ ഇരയാണെന്നാണ് കോൺഗ്രസ് മുഖപത്രം വാദിക്കുന്നത്. "കോൺഗ്രസിന്റെ കുപ്പായത്തിൽ വീണ ചാണകത്തുള്ളികൊണ്ട് മൂക്കുപൊത്തുംപോലെയാണ് സി.പി.എം. രാഹുൽ മാങ്കൂട്ടത്തിലിനെ ചൂണ്ടിക്കാട്ടി സദാചാര പ്രസംഗം നടത്തുന്നത്," എന്ന് വീക്ഷണം വിമർശിച്ചു. എതിരാളികൾക്കെതിരേ വ്യാജമായ ലൈംഗികാരോപണങ്ങൾ തിരഞ്ഞെടുപ്പ് അടുക്കുമ്പോൾ സി.പി.എമ്മിൽ പടർന്നുപിടിക്കുന്ന 'അതിസാരവും ഛർദിയുമാണ്' എന്നും മുഖപ്രസംഗത്തിൽ പറയുന്നു.
നിലവിൽ, രാഹുലിനെതിരേ സ്വീകരിച്ച നിലപാടിൽ കോൺഗ്രസ് ഉറച്ചുനിൽക്കുന്നു. നിരപരാധിത്വം തെളിയിക്കുന്നതുവരെ പുറത്തായ ആളെ പാർട്ടിയിൽ തിരിച്ചെടുക്കില്ലെന്നും മുരളീധരൻ വ്യക്തമാക്കി.