തിരുവനന്തപുരം: രാഹുൽ മാങ്കൂട്ടത്തിലിനെ പിന്തുണച്ചുകൊണ്ട് പാർട്ടി മുഖപത്രമായ 'വീക്ഷണ'ത്തിൽ വന്ന മുഖപ്രസംഗം കോൺഗ്രസ് നിലപാടിന് എതിരാണെന്ന് കെ.പി.സി.സി. അധ്യക്ഷൻ സണ്ണി ജോസഫ് വ്യക്തമാക്കി. പാർട്ടി പത്രത്തിൽ വരാൻ പാടില്ലാത്ത കാര്യമായതിനാൽ തിരുത്താൻ നിർദേശം നൽകിയിട്ടുണ്ടെന്നും അദ്ദേഹം അറിയിച്ചു.(The editorial is against Congress's stand, says KPCC President Sunny Joseph)
വന്നിട്ടുള്ള മുഖപ്രസംഗം പാർട്ടിയുടെ നയത്തിനും തീരുമാനത്തിനും യോജിച്ചതല്ലെന്ന് മനസ്സിലാക്കിയതിന്റെ അടിസ്ഥാനത്തിലാണ് തിരുത്താൻ നിർദേശം നൽകിയിട്ടുള്ളതെന്ന് സണ്ണി ജോസഫ് പറഞ്ഞു. "രാഹുൽ മാങ്കൂട്ടത്തിലിനെ സസ്‌പെൻഡ് ചെയ്തത് സണ്ണി ജോസഫോ വി.ഡി. സതീശനോ ഒറ്റയ്ക്കല്ല. കേരളത്തിലെ കോൺഗ്രസിലെ സമുന്നത നേതൃത്വം ഒന്നിച്ചെടുത്ത തീരുമാനമാണത്. ഒരാൾക്കും ആ തീരുമാനത്തിൽ വിയോജിപ്പുണ്ടായിരുന്നില്ല," അദ്ദേഹം കൂട്ടിച്ചേർത്തു.
'പാപം ചെയ്യാത്തവർ കല്ലെറിയട്ടെ' എന്ന തലക്കെട്ടിൽ വീക്ഷണത്തിൽ വന്ന മുഖപ്രസംഗം പാർട്ടിയെ പ്രതിരോധത്തിലാക്കിയിരുന്നു. മാങ്കൂട്ടത്തിൽ രാഷ്ട്രീയ ഗൂഢാലോചനയുടെ ഇരയാണെന്നായിരുന്നു മുഖപ്രസംഗത്തിലെ പ്രധാന വാദം. "കോൺഗ്രസിന്റെ കുപ്പായത്തിൽ വീണ ചാണകത്തുള്ളികൊണ്ട് മൂക്കുപൊത്തുംപോലെയാണ് സി.പി.എം. രാഹുൽ മാങ്കൂട്ടത്തിലിനെ ചൂണ്ടിക്കാട്ടി സദാചാര പ്രസംഗം നടത്തുന്നത്," എന്ന് വീക്ഷണം വിമർശിച്ചു.
എതിരാളികൾക്കെതിരേ വ്യാജമായ ലൈംഗികാരോപണങ്ങൾ തിരഞ്ഞെടുപ്പടുക്കുമ്പോൾ സി.പി.എമ്മിൽ പടർന്നുപിടിക്കുന്ന 'അതിസാരവും ഛർദിയുമാണ്' എന്നും മുഖപ്രസംഗത്തിൽ പരാമർശിച്ചിരുന്നു. എന്നാൽ, ഈ നിലപാടുകൾ പാർട്ടി തീരുമാനത്തിന് വിരുദ്ധമാണെന്ന് ചൂണ്ടിക്കാട്ടിയാണ് കെ.പി.സി.സി. പ്രസിഡന്റ് തിരുത്തൽ നിർദേശം നൽകിയിരിക്കുന്നത്.