കൊല്ലം : മുൻ മുഖ്യമന്ത്രി ഉമ്മൻചാണ്ടിയെ അപകീർത്തിപ്പെടുത്താനായി സോളാർ തട്ടിപ്പ് കേസിലെ പ്രതിയുടെ കത്തിൽ നാല് പേജുകൾ അധികമായി കൂട്ടിച്ചേർത്തു എന്ന ആരോപണത്തിന് ബലമേകുന്ന നിർണായക വെളിപ്പെടുത്തൽ കൊട്ടാരക്കര കോടതിയിൽ. പ്രതി ലൈംഗിക പീഡനം ആരോപിച്ച് എഴുതിയ കത്തിൽ 21 പേജുകൾ മാത്രമാണുണ്ടായിരുന്നത് എന്ന് പത്തനംതിട്ട ജില്ലാ ജയിൽ സൂപ്രണ്ട് വിചാരണയിൽ മൊഴി നൽകി.(Solar case accused's letter is only 21 pages, Conspiracy is strong in the allegations against Oommen Chandy)
കത്ത് എഴുതിയ കാലയളവിൽ പ്രതിയെ പാർപ്പിച്ചിരുന്ന പത്തനംതിട്ട ജില്ലാ ജയിലിന്റെ സൂപ്രണ്ടാണ് കോടതിയിൽ സുപ്രധാന മൊഴി നൽകിയത്. പോലീസ് കസ്റ്റഡിയിലായിരുന്ന പ്രതിയെ പെരുമ്പാവൂർ ഡിവൈഎസ്‌പി ജയിലിൽ എത്തിച്ചു.
പ്രതിയുടെ ദേഹപരിശോധനയ്ക്കിടെയാണ് 21 പേജുകളുള്ള കത്ത് കണ്ടെത്തിയത്. ഇത് അഭിഭാഷകന് നൽകാനുള്ളതാണെന്ന് പ്രതി അറിയിച്ചു. ജൂലായ്‌ 24-ന് കാണാനെത്തിയ അഭിഭാഷകന് സൂപ്രണ്ടിന്റെ സാന്നിധ്യത്തിൽ പ്രതി ഈ കത്ത് കൈമാറി. 21 പേജാണ് പ്രതി എഴുതിയതെന്ന് വ്യക്തമാക്കുന്ന രേഖകളും, അഭിഭാഷകന് കത്ത് കൈമാറിയതിനെ സൂചിപ്പിക്കുന്ന കൈപ്പറ്റുരസീതും സൂപ്രണ്ട് കോടതിയിൽ ഹാജരാക്കി.
സോളാർ തട്ടിപ്പ് കേസുമായി ബന്ധപ്പെട്ട് വിവാദമായ ലൈംഗികപീഡന ആരോപണ കത്ത്, പ്രതി പിന്നീട് സോളാർ കമ്മീഷന് മുൻപിൽ നൽകിയത് 25 പേജുകളായിട്ടാണ്. ഇതോടെ, യഥാർത്ഥത്തിൽ എഴുതിയ 21 പേജുകൾക്ക് പുറമേ, അധികമായി നാല് പേജുകൾ പിന്നീട് ഗൂഢാലോചനയിലൂടെ എഴുതിച്ചേർത്തതാണെന്ന ആരോപണം ശക്തമാവുകയായിരുന്നു.
അധികമായെത്തിയ ഈ നാല് പേജുകൾ ഗൂഢാലോചനയുടെ ഭാഗമായി കൂട്ടിച്ചേർത്തതാണെന്ന് ആരോപിച്ച് അഭിഭാഷകൻ സുധീർ ജേക്കബാണ് കൊട്ടാരക്കര കോടതിയിൽ ഹർജി നൽകിയത്. ഈ ഗൂഢാലോചനയിൽ ഒരു മന്ത്രിയും പ്രതിയും ഉൾപ്പെട്ടിട്ടുണ്ടെന്നും ഹർജിയിൽ ആരോപിക്കുന്നു.
ജയിൽ സൂപ്രണ്ടിന്റെ ഇപ്പോഴത്തെ മൊഴി, കത്തിൽ തിരിമറി നടന്നുവെന്ന ആരോപണത്തിന് അടിവരയിടുന്നതാണ്. മുൻ മുഖ്യമന്ത്രി ഉമ്മൻചാണ്ടിയടക്കമുള്ള രാഷ്ട്രീയ നേതാക്കൾക്കെതിരെ ലൈംഗികാരോപണം ഉന്നയിച്ച കത്തിന്റെ വിശ്വാസ്യതയെ ചോദ്യം ചെയ്യുന്ന മൊഴി കേസിന്റെ വിചാരണയിൽ നിർണ്ണായകമായേക്കും.