ഇടുക്കി: ആനച്ചാലിലെ സ്വകാര്യ സ്കൈ ഡൈനിങ് കേന്ദ്രത്തിൽ വിനോദസഞ്ചാരികൾ കുടുങ്ങിയ സംഭവത്തിൽ പോലീസ് കേസെടുത്തു. മനുഷ്യജീവന് അപകടമുണ്ടാക്കുന്ന പ്രവൃത്തികൾ എന്ന വകുപ്പ് ചുമത്തിയാണ് കേന്ദ്രത്തിന്റെ നടത്തിപ്പുകാരായ പ്രവീൺ, സോജൻ എന്നിവർക്കെതിരെ കേസെടുത്തത്.(Sky dining accident at Idukki, Case filed against operators )
ക്രെയിനിന് സാങ്കേതിക തകരാറുണ്ടായതിനെ തുടർന്ന് 120 അടിയോളം ഉയരത്തിൽ കുടുങ്ങിയ അഞ്ച് പേരെയും മൂന്ന് മണിക്കൂർ നീണ്ട രക്ഷാദൗത്യത്തിനൊടുവിൽ സുരക്ഷിതമായി താഴെയെത്തിച്ചു. സ്കൈ ഡൈനിങ് പേടകത്തിൽ മംഗലാപുരം സ്വദേശികളായ മലയാളികളാണ് കുടുങ്ങിയത്. മുഹമ്മദ് സഫ്വാൻ, തൗഫീന (ഭാര്യ), ഇവാൻ, ഇനാര (മക്കൾ), ഹരിപ്രിയ (ജീവനക്കാരി) എന്നിവരാണിത്.
രക്ഷാപ്രവർത്തനത്തിൽ രണ്ടര വയസ്സുള്ള കുട്ടി ഉൾപ്പെടെയുള്ള കുട്ടികളെയാണ് ആദ്യം താഴെയിറക്കിയത്. എല്ലാവരെയും സുരക്ഷിതമായി താഴെയെത്തിക്കാൻ സാധിച്ചതായി അധികൃതർ അറിയിച്ചു. ആനച്ചാലിലുള്ള സ്വകാര്യ സ്കൈഡൈനിങ് കേന്ദ്രത്തിലെ പേടകം ഉയർത്തി നിർത്തിയിരുന്ന ക്രെയിനിനുണ്ടായ സാങ്കേതിക തകരാറാണ് അപകടത്തിന് കാരണമായതെന്ന് അധികൃതർ പറയുന്നു.
അഞ്ചംഗ സംഘം മൂന്ന് മണിക്കൂറോളമാണ് 120 അടിയോളം ഉയരത്തിൽ കുടുങ്ങിക്കിടന്നത്. മൂന്നാർ, അടിമാലി എന്നിവിടങ്ങളിൽ നിന്നുള്ള ഫയർ ഫോഴ്സ് സംഘമാണ് രക്ഷാപ്രവർത്തനം നടത്തിയത്. വടം ഉപയോഗിച്ചാണ് സഞ്ചാരികളെ താഴെയെത്തിച്ചത്. സംഭവം നടന്ന് ഏറെ നേരത്തിനു ശേഷമാണ് ഫയർ ഫോഴ്സിനെ വിവരം അറിയിച്ചത്. കൂടാതെ, സ്കൈ ഡൈനിങ് കേന്ദ്രം പ്രവർത്തിച്ചിരുന്നത് വേണ്ടത്ര അനുമതികളോ സുരക്ഷാ സജ്ജീകരണങ്ങളോ ഇല്ലാതെയാണ് എന്നും ഫയർഫോഴ്സ് ഉദ്യോഗസ്ഥർ സ്ഥിരീകരിച്ചു. ഇത് നടത്തിപ്പുകാർക്കെതിരായ കേസ് കൂടുതൽ ശക്തമാക്കാൻ സാധ്യതയുണ്ട്.