മലപ്പുറം: 14 വയസ്സുകാരിയെ ലൈംഗികാതിക്രമത്തിന് വിധേയനാക്കിയ കേസിൽ പ്രതിക്ക് നാല് വർഷം കഠിന തടവും 5,000 രൂപ പിഴയും ശിക്ഷ വിധിച്ച് കോടതി. മുത്തേടം കാരപ്പുറം സ്വദേശി പുതുവായ് വിനോദിനെതിരെയാണ് (34) നിലമ്പൂർ അതിവേഗ പോക്സോ കോടതി ജഡ്ജി കെ.പി. ജോയ് ശിക്ഷ വിധിച്ചത്.(Sexual assault on 14-year-old girl, Nilambur POCSO court sentences accused to 4 years rigorous imprisonment and fine)
പിഴയടയ്ക്കുന്ന തുക അതിജീവിതയ്ക്ക് നൽകും. പിഴയടച്ചില്ലെങ്കിൽ പ്രതി രണ്ട് മാസവും രണ്ട് ആഴ്ചയും അധിക തടവ് അനുഭവിക്കണമെന്നും കോടതി ഉത്തരവിട്ടു. 2024 ജൂൺ 16-നാണ് കേസിനാസ്പദമായ സംഭവം നടന്നത്. ശിക്ഷ വിധിച്ച പ്രതിയെ തവനൂർ ജയിലിലേക്ക് അയച്ചു.
അതിജീവിതയുടെയും കുടുംബത്തിന്റെയും പരാതിയുടെ അടിസ്ഥാനത്തിൽ പോത്തുകല്ല് പൊലീസാണ് കേസ് രജിസ്റ്റർ ചെയ്തത്. പോത്തുകൽ സ്റ്റേഷൻ സബ് ഇൻസ്‌പെക്ടർ കെ. സോമനാണ് അന്വേഷണം നടത്തിയത്. സീനിയർ സിവിൽ പൊലീസ് ഓഫിസർ എം. ബിജിത അന്വേഷണത്തിൽ സഹായിച്ചു.
പ്രോസിക്യൂഷനായി സ്‌പെഷൽ പബ്ലിക് പ്രോസിക്യൂട്ടർ അഡ്വ. സാം കെ. ഫ്രാൻസിസ് ഹാജരായി. കേസിൽ 17 സാക്ഷികളെ വിസ്തരിക്കുകയും 13 രേഖകൾ കോടതിയിൽ ഹാജരാക്കുകയും ചെയ്തു. പ്രോസിക്യൂഷൻ ലൈസൺ വിങ്ങിലെ സീനിയർ സിവിൽ പൊലീസ് ഓഫിസർ പി.സി. ഷീബ പ്രോസിക്യൂഷനെ സഹായിച്ചു.