തിരുവനന്തപുരം: ശബരിമല സ്വർണ്ണക്കൊള്ള കേസിൽ ഏഴാം പ്രതിയായ മുൻ തിരുവാഭരണ കമ്മീഷണർ കെ.എസ്. ബൈജുവിനെ പ്രത്യേക അന്വേഷണ സംഘം വീണ്ടും കസ്റ്റഡിയിൽ വാങ്ങി. പുതിയ കണ്ടെത്തലുകളുടെ അടിസ്ഥാനത്തിൽ മൊഴിയെടുക്കേണ്ടത് അനിവാര്യമാണെന്ന എസ്.ഐ.ടി.യുടെ വാദം അംഗീകരിച്ച കോടതി, ഒരു ദിവസത്തേക്കാണ് അദ്ദേഹത്തെ കസ്റ്റഡിയിൽ വിട്ടത്.(Sabarimala gold theft case, KS Baiju in SIT custody again)
ദ്വാരപാലക ശിൽപ്പങ്ങളിലെ സ്വർണ്ണം കടത്തിയ കേസിലാണ് കെ.എസ്. ബൈജുവിനെ വീണ്ടും കസ്റ്റഡിയിൽ വിട്ടത്. പുതിയ കണ്ടെത്തലുകളുടെ അടിസ്ഥാനത്തിൽ വിശദമായ മൊഴിയെടുക്കുന്നതിനാണ് എസ്.ഐ.ടി. കോടതിയെ സമീപിച്ചത്. അതേസമയം, കട്ടിളപ്പാളിയിലെ സ്വർണ്ണം കടത്തിയ കേസിൽ കെ.എസ്. ബൈജുവിന്റെ ജാമ്യാപേക്ഷ കൊല്ലം വിജിലൻസ് കോടതി തള്ളി.
കേസിൽ മുൻ എക്‌സിക്യുട്ടീവ് ഓഫീസർ ഡി. സുധീഷ് കുമാറിന്റെ ജാമ്യാപേക്ഷയിൽ വിശദമായ വാദം കേൾക്കുന്നതിനായി കോടതി ഡിസംബർ 3-ലേക്ക് മാറ്റി. മുൻ ദേവസ്വം കമ്മീഷണർ എൻ. വാസുവിന്റെ ജാമ്യാപേക്ഷയിലും ഡിസംബർ 3-ന് തന്നെ കോടതി വിധി പറയും. ശബരിമല സ്വർണ്ണക്കൊള്ള കേസിലെ പ്രമുഖ പ്രതികളെ ലക്ഷ്യമിട്ടുള്ള അന്വേഷണമാണ് പ്രത്യേക അന്വേഷണ സംഘം ഊർജിതമാക്കിയിരിക്കുന്നത്.