പെട്രോൾ പമ്പിലെ കവർച്ച; മൂന്നു പേർ കസ്റ്റഡിയിൽ
ഡിവൈ.എസ്.പിയുടെ കീഴിലുള്ള പ്രത്യേക സ്ക്വാഡ് ആണ് കേസ് അന്വേഷിക്കുന്നത്. തമിഴ്നാട് രജിസ്‌ട്രേഷൻ നമ്പറുള്ള മാരുതി ആൾട്ടോ കാറിലാണ് മോഷ്ടാക്കൾ എത്തിയിരുന്നത്. അത് കൊണ്ട് ആദ്യഘട്ടത്തിൽ പ്രതികൾ തമിഴ്നാട് സ്വദേശികളാണന്ന സംശയത്തിലായിരുന്നു പൊലീസ്. വെള്ളിയാഴ്ച പുലർച്ചെ മുക്കം നഗരസഭയിലെ നീലേശ്വരം ഹിന്ദുസ്ഥാൻ പെട്രോളിയം പമ്പിലാണ് മോഷണം നടന്നത്.
ഇന്ധനം നിറക്കാനായാണ് നാലംഗ സംഘം വെള്ള കാറിൽ പമ്പിലെത്തിയത്. ഇതിനിടെ മൂന്നുപേർ വാഹനത്തിൽ നിന്നിറങ്ങി. ഇതിൽ ഒരാൾ ശൗചാലയത്തിന് സമീപത്തേക്ക് പോയി. ഇന്ധനം നിറച്ച് കാർ പുറത്തേക്ക് പോയതിന് ശേഷം ജീവനക്കാരൻ മേശയിൽ തലവെച്ച് കിടന്നു. ഇതിനിടെ പിന്നിലൂടെ എത്തിയ രണ്ട് പേർ ജീവനക്കാരനായ സുരേഷിന്‍റെ കണ്ണിലേക്ക് മുളകുപൊടി വിതറുകയും മൂന്നാമൻ താൻ ധരിച്ചിരുന്ന മുണ്ടുകൊണ്ട് പമ്പ് ജീവനക്കാരന്‍റെ മുഖം മറച്ച ശേഷം പണം അപഹരിക്കുകയുമായിരുന്നു.