തിരുവനന്തപുരം: ലൈംഗിക പീഡന കേസിൽ ഒളിവിലായിരുന്ന രാഹുൽ മാങ്കൂട്ടത്തിൽ എം.എൽ.എ. തലസ്ഥാനത്ത് എത്തി. ഇന്നലെയാണ് രാഹുൽ തിരുവനന്തപുരത്ത് എത്തിയത്. മുൻകൂർ ജാമ്യ ഹർജി നൽകുന്നതിന്റെ ഭാഗമായി വഞ്ചിയൂരിലെ അഭിഭാഷകന്റെ ഓഫീസിലാണ് രാഹുൽ മാങ്കൂട്ടത്തിൽ എത്തിയത്.(Rahul Mamkootathil, who has been absconding, arrived in Thiruvananthapuram yesterday)
രാഹുൽ നേരിട്ട് എത്തിയാണ് വക്കാലത്തിൽ ഒപ്പിട്ടതെന്ന് അഭിഭാഷകൻ സ്ഥിരീകരിച്ചു. പോലീസ് കേസെടുത്തതിന് പിന്നാലെ രാഹുൽ ഒളിവിൽ പോവുകയായിരുന്നുവെന്നായിരുന്നു വിവരം. ഇതിനിടയിലാണ് മുൻകൂർ ജാമ്യ ഹർജിയുമായി ബന്ധപ്പെട്ട് രാഹുൽ തിരുവനന്തപുരത്തെത്തിയത്.
രാഹുലിനെ പിടികൂടാൻ പോലീസ് അന്വേഷണം ഊർജിതമാക്കിയിരുന്നു. ഇതിന്റെ ഭാഗമായി ലുക്കൗട്ട് സർക്കുലറും പോലീസ് പുറത്തുവിട്ടിരുന്നു. തിരുവനന്തപുരത്ത് എത്തിയശേഷം രാഹുൽ പിന്നീട് എങ്ങോട്ട് പോയെന്ന കാര്യത്തിൽ നിലവിൽ വിവരമൊന്നുമില്ല. രാഹുലിന്റെ മുൻകൂർ ജാമ്യാപേക്ഷ തിരുവനന്തപുരം സെഷൻസ് കോടതി ബുധനാഴ്ച പരിഗണിക്കും. നേരത്തെ തിങ്കളാഴ്ച ഹർജി പരിഗണിക്കുമെന്നായിരുന്നു സൂചനയെങ്കിലും ഇത് ബുധനാഴ്ചത്തേക്ക് മാറ്റുകയായിരുന്നു. ബുധനാഴ്ച ജാമ്യം ലഭിക്കുമോ എന്ന കാര്യത്തിൽ വ്യക്തതയില്ലാത്തതിനാൽ, രാഹുലിന്റെ അറസ്റ്റ് ഉടൻ ഉണ്ടാകുമോയെന്നാണ് രാഷ്ട്രീയ കേരളം ഉറ്റുനോക്കുന്നത്.
രാഹുൽ മാങ്കൂട്ടത്തിൽ സംസ്ഥാനം വിട്ടെന്ന റിപ്പോർട്ടുകൾക്കിടയിലും അദ്ദേഹം നിലവിൽ പാലക്കാട്ടെ ഒരു രഹസ്യ കേന്ദ്രത്തിലാണ് ഉള്ളതെന്നാണ് വിവരം. പാലക്കാട് ജില്ല വിട്ട് പോയാൽ അത് മുൻകൂർ ജാമ്യാപേക്ഷയെ ദോഷകരമായി ബാധിക്കുമെന്ന് നിയമോപദേശം ലഭിച്ചതിനാലാണ് രാഹുൽ ജില്ലയിൽ തുടരുന്നത്. എം.എൽ.എയുടെ ഔദ്യോഗിക വാഹനം താമസിക്കുന്ന ഫ്ലാറ്റിൽത്തന്നെയുണ്ട്. മറ്റൊരു വാഹനത്തിലാണ് രാഹുൽ രഹസ്യ കേന്ദ്രത്തിലേക്ക് മാറിയത്. രാഹുലിന്റെ ഡ്രൈവറും പേഴ്സണൽ അസിസ്റ്റന്റ് ഫസലും പാലക്കാട് ജില്ലയിലുണ്ട്. ഇവരുടെ ഫോൺ സ്വിച്ച് ഓഫ് ആയിരുന്നെങ്കിലും ഇപ്പോൾ എം.എൽ.എ. ഓഫീസിൽ ഉണ്ടെന്നാണ് വിവരം.
ബലാത്സംഗ പരാതിയിൽ പരാതിക്കാരിയുടെ മൊഴിയുടെ കൂടുതൽ വിവരങ്ങൾ പുറത്തുവന്നിട്ടുണ്ട്. രാഹുൽ മാങ്കൂട്ടത്തിലിന്റെ ജാമ്യ ഹർജിയിലെ പ്രധാന വാദങ്ങളെ പൊളിക്കുന്നതാണ് യുവതിയുടെ നിർണ്ണായക മൊഴി. യുവതിയുടെ ആദ്യ വിവാഹം 2024 ഓഗസ്റ്റ് 22-ന് ക്ഷേത്രത്തിൽ വെച്ചാണ് നടന്നത്. ഇത് നിയമപരമായി രജിസ്റ്റർ ചെയ്തിട്ടില്ല. വിവാഹബന്ധം നാല് ദിവസം മാത്രമാണ് ഒരുമിച്ച് താമസിച്ചതെന്നും ഒരു മാസത്തിനുള്ളിൽ ബന്ധം ഒഴിഞ്ഞുവെന്നും യുവതി മൊഴി നൽകി. യുവതിയുടെ മൊഴി രാഹുലിന് കുരുക്കായി. വിവാഹ വാഗ്ദാനം നൽകിയതിനെത്തുടർന്നാണ് ഗർഭം ധരിച്ചതെന്ന് യുവതി പോലീസിന് മൊഴി നൽകി.
"വിവാഹബന്ധം വേർപെടുത്തിയതിനാൽ വീട്ടുകാർ വിവാഹത്തിന് സമ്മതിക്കില്ല. എന്നാൽ, ഒരു കുഞ്ഞുണ്ടെങ്കിൽ വീട്ടിൽ വിവാഹത്തിന് സമ്മതിക്കും എന്ന് രാഹുൽ വിശ്വസിപ്പിച്ചു. ഇത് കാരണമാണ് ഗർഭം ധരിച്ചത്," എന്നാണ് യുവതി അന്വേഷണ സംഘത്തോട് വെളിപ്പെടുത്തിയത്. ഈ മൊഴി രാഹുലിന്റെ മുൻകൂർ ജാമ്യാപേക്ഷയിലെ വാദങ്ങളെ പൂർണ്ണമായും പൊളിക്കുന്നതാണ്. രാഹുലുമായി ബന്ധപ്പെടുന്നതിന് മുൻപുള്ള തന്റെ വിവാഹബന്ധത്തെക്കുറിച്ചും യുവതി നിർണായക വിവരങ്ങൾ നൽകിയിട്ടുണ്ട്.വിവാഹബന്ധം ഒഴിഞ്ഞ് അഞ്ച് മാസങ്ങൾക്ക് ശേഷമാണ് രാഹുലുമായി പരിചയപ്പെട്ടതെന്നും യുവതിയുടെ മൊഴിയിൽ പറയുന്നു.
'വിവാഹിതയ്ക്ക് എങ്ങനെ വിവാഹ വാഗ്ദാനം നൽകും' എന്ന രാഹുലിന്റെ വാദത്തെയും 'ഭർത്താവിരിക്കെയാണ് യുവതി രാഹുലുമായി ബന്ധപ്പെട്ടത്' എന്ന ആരോപണത്തെയും തള്ളിക്കളയുന്നതാണ് യുവതിയുടെ ഈ വിശദമായ മൊഴി. എം.എൽ.എ.യുടെ മുൻകൂർ ജാമ്യാപേക്ഷ ബുധനാഴ്ച തിരുവനന്തപുരം സെഷൻസ് കോടതി പരിഗണിക്കാനിരിക്കെ, കേസിൽ പോലീസിന്റെ അറസ്റ്റ് ഉൾപ്പെടെയുള്ള തുടർനടപടികൾ നിർണായകമാകും.