'രാഹുൽ മാങ്കൂട്ടത്തിൽ ഒളിവിലിരിക്കുന്നത് ഏത് ആസ്ഥാനത്ത് ആണെന്ന് അറിഞ്ഞാൽ മതി, രാജിവച്ച് പുറത്തു പോകണം': മന്ത്രി V ശിവൻകുട്ടി | Rahul Mamkootathil

രാഹുൽ മാങ്കൂട്ടത്തിൽ ഉടൻ കീഴടങ്ങണം എന്നാണ് അദ്ദേഹം ആവശ്യപ്പെട്ടത്
Rahul Mamkootathil should resign and leave, says Minister V Sivankutty

തിരുവനന്തപുരം : രാഹുൽ മാങ്കൂട്ടത്തിൽ എം.എൽ.എക്കെതിരെ ഉയർന്ന ബലാത്സംഗക്കേസിന്റെ പശ്ചാത്തലത്തിൽ കോൺഗ്രസിനെ പരിഹസിച്ച് വിദ്യാഭ്യാസമന്ത്രി വി. ശിവൻകുട്ടി രംഗത്ത്. രാഹുൽ മാങ്കൂട്ടത്തിൽ ഒളിവിൽ കഴിയുന്നത് എ.ഐ.സി.സി. ആസ്ഥാനത്താണോ, കെ.പി.സി.സി. ആസ്ഥാനത്താണോ, ഡി.സി.സി. ഓഫീസിലാണോ എന്നറിഞ്ഞാൽ മതിയെന്ന് മന്ത്രി പരിഹസിച്ചു.(Rahul Mamkootathil should resign and leave, says Minister V Sivankutty)

രാഹുൽ മാങ്കൂട്ടത്തിൽ ഉടൻ കീഴടങ്ങണം, മാന്യതയുണ്ടെങ്കിൽ എം.എൽ.എ. സ്ഥാനം രാജിവെച്ച് പുറത്തുപോകണമെന്നും മന്ത്രി ആവശ്യപ്പെട്ടു. അതിജീവിതയെ സാമൂഹ്യമാധ്യമങ്ങളിലൂടെ അധിക്ഷേപിക്കുന്നത് അംഗീകരിക്കാനാവില്ലെന്നും മന്ത്രി കൂട്ടിച്ചേർത്തു.

അതേസമയം, കേസിൽ രാഹുലിന്റെ മുൻകൂർ ജാമ്യ ഹർജിയിലെ പ്രധാന വാദങ്ങളെ പൊളിക്കുന്ന നിർണായക വിവരങ്ങളാണ് പരാതിക്കാരി അന്വേഷണ സംഘത്തിന് കൈമാറിയത്. ആദ്യ വിവാഹം നടന്നത് 2024 ഓഗസ്റ്റ് 22-ന് ക്ഷേത്രത്തിൽ വെച്ചാണ്. ഈ വിവാഹം നിയമപരമായി രജിസ്റ്റർ ചെയ്തിട്ടില്ല. നാല് ദിവസം മാത്രമാണ് ഇരുവരും ഒരുമിച്ച് താമസിച്ചത്. ഒരു മാസത്തിനുള്ളിൽ ബന്ധം ഒഴിഞ്ഞു.

വിവാഹബന്ധം ഒഴിഞ്ഞ് അഞ്ച് മാസങ്ങൾക്ക് ശേഷമാണ് താൻ രാഹുലുമായി പരിചയപ്പെട്ടതെന്നും യുവതി മൊഴി നൽകി.

ഇതോടെ, 'വിവാഹിതയ്ക്ക് എങ്ങനെ വിവാഹ വാഗ്ദാനം നൽകും' എന്ന രാഹുലിന്റെ വാദവും, 'ഭർത്താവിരിക്കെയാണ് യുവതി രാഹുലുമായി ബന്ധപ്പെട്ടത്' എന്ന ആരോപണവും പൊളിയുകയാണ്. ഭർത്താവിന്റെ ഉപദ്രവങ്ങൾ വിവരിച്ചാണ് യുവതി തന്നോട് സംസാരിച്ചതെന്നും, ആ ബന്ധം ലൈംഗികബന്ധത്തിൽ എത്തിയത് യുവതി വിവാഹിതയാണെന്ന് അറിഞ്ഞുകൊണ്ടാണെന്നും രാഹുൽ മുൻകൂർ ജാമ്യാപേക്ഷയിൽ വ്യക്തമാക്കിയിരുന്നു.

യുവതിയെ പരിശോധിച്ച ഡോക്ടറുടെ മൊഴി അന്വേഷണ സംഘം ഇന്ന് രേഖപ്പെടുത്തും. ഈ മൊഴി കേസിൽ നിർണ്ണായകമാകും. രാഹുൽ മാങ്കൂട്ടത്തിൽ നിലവിൽ പാലക്കാട്ടെ രഹസ്യ കേന്ദ്രത്തിലുണ്ട് എന്നാണ് റിപ്പോർട്ടുകൾ. പാലക്കാട് ജില്ല വിട്ടാൽ അത് മുൻകൂർ ജാമ്യത്തെ ബാധിക്കുമെന്ന നിയമോപദേശം ലഭിച്ചതിനാലാണ് രാഹുൽ ജില്ലയിൽ തുടരുന്നത്.

എം.എൽ.എയുടെ ഔദ്യോഗിക വാഹനം ഫ്ലാറ്റിലുണ്ടെങ്കിലും മറ്റൊരു വാഹനത്തിലാണ് രാഹുൽ ഒളിവിൽ കഴിയുന്നത്. ഡ്രൈവറും പേഴ്സണൽ അസിസ്റ്റന്റ് ഫസലും എം.എൽ.എ. ഓഫീസിലുണ്ട്. രാഹുൽ മാങ്കൂട്ടത്തിലിന്റെ മുൻകൂർ ജാമ്യാപേക്ഷ തിങ്കളാഴ്ച കോടതി പരിഗണിക്കും.

Related Stories

No stories found.
Times Kerala
timeskerala.com