പാലക്കാട്: ബലാൽസംഗക്കേസിൽ ഒളിവിൽ കഴിയുന്ന എം.എൽ.എ. രാഹുൽ മാങ്കൂട്ടത്തിലിനെ തള്ളാതെ കോൺഗ്രസ് നേതാവ് വി.കെ. ശ്രീകണ്ഠൻ എം.പി. രംഗത്ത്. എം.എൽ.എ. കഴിഞ്ഞ ദിവസം വരെ 'ലൈവ്' ആയിരുന്നല്ലോയെന്ന് ശ്രീകണ്ഠൻ പ്രതികരിച്ചു.(Rahul Mamkootathil Allegations will not affect the election, says VK Sreekandan MP)
രാഹുലിനെതിരെ ഉയർന്ന ആരോപണങ്ങൾ തിരഞ്ഞെടുപ്പിനെ ബാധിക്കില്ലെന്നും, ആളുകൾക്ക് അക്കാര്യത്തിൽ ആശങ്കയില്ലെന്നും അദ്ദേഹം പറഞ്ഞു. "ആരും അക്കാര്യം ചോദിക്കുന്നു പോലുമില്ല. എം.എൽ.എയെക്കൊണ്ട് ജനങ്ങൾക്ക് കിട്ടേണ്ട ഉപകാരം കിട്ടുന്നുണ്ട്," വി.കെ. ശ്രീകണ്ഠൻ എം.പി. കൂട്ടിച്ചേർത്തു.
രാഹുൽ മാങ്കൂട്ടത്തിൽ വിഷയത്തിൽ കോൺഗ്രസ് ചെയ്യേണ്ടതെല്ലാം ചെയ്തിട്ടുണ്ടെന്ന് മുതിർന്ന നേതാവ് രമേശ് ചെന്നിത്തല പ്രതികരിച്ചു. "ഇതിൽ കൂടുതൽ ഞങ്ങൾക്ക് എന്ത് ചെയ്യാൻ കഴിയും? സി.പി.ഐ.എം. ഇങ്ങനെ ചെയ്യുമോ?" എന്ന് അദ്ദേഹം ചോദിച്ചു. കോൺഗ്രസിനെ തകർക്കാൻ സി.പി.ഐ.എം.-ബി.ജെ.പി. ബാന്ധവം നിലനിൽക്കുന്നു. സി.പി.ഐ.എം.-ബി.ജെ.പി. അന്തർധാര സജീവമാണെന്നും അദ്ദേഹം ആരോപിച്ചു.
രാഹുൽ മാങ്കൂട്ടത്തിൽ വിഷയത്തിൽ കോൺഗ്രസ് നേതാക്കൾക്കിടയിൽത്തന്നെ പരസ്പര വിരുദ്ധമായ പ്രതികരണങ്ങൾ ഉണ്ടാകുന്നതിനിടയിലാണ് ഈ അഭിപ്രായങ്ങൾ പുറത്തുവരുന്നത്. എം.എൽ.എ.യുടെ മുൻകൂർ ജാമ്യാപേക്ഷ തിങ്കളാഴ്ച കോടതി പരിഗണിക്കും.