തൃശ്ശൂർ: രാഗം തിയേറ്റർ നടത്തിപ്പുകാരൻ സുനിലിനെ കൊലപ്പെടുത്താൻ ശ്രമിച്ച കേസിൽ അറസ്റ്റിലായ പ്രതികളെ സ്ഥലത്തെത്തിച്ച് അന്വേഷണ സംഘം തെളിവെടുപ്പ് നടത്തി. പ്രതികൾക്ക് ക്വട്ടേഷൻ നൽകിയ മണ്ണൂത്തി സ്വദേശി സിജോ, പ്രവാസി വ്യവസായിയും സിനിമാ നിർമ്മാതാവുമായ റാഫേലിന്റെ അടുത്തയാളാണെന്നും, ക്വട്ടേഷൻ നൽകിയത് റാഫേൽ ആണെന്നും സുനിൽ ആരോപിച്ചു.(Ragam Theater owner attack case, Sunil identifies the accused)
സുനിലിനെയും ഡ്രൈവറെയും വെട്ടിയ കേസിൽ അറസ്റ്റിലായ കരുവാറ്റ സ്വദേശികളായ ആദിത്യൻ, ഗുരുദാസ് എന്നിവരെയാണ് തൃശ്ശൂർ എ.സി.പി. സുരേഷിന്റെ നേതൃത്വത്തിലുള്ള പോലീസ് സംഘം ഉച്ചയോടെ വിളപ്പായയിൽ എത്തിച്ച് തെളിവെടുപ്പ് നടത്തിയത്. സുനിലിനായി കാത്തുനിന്ന വഴികൾ, ആക്രമണം നടത്തിയ ശേഷം രക്ഷപ്പെട്ടോടിയ സ്ഥലങ്ങൾ എന്നിവ പ്രതികൾ പോലീസിന് വിവരിച്ചു നൽകി.
പ്രതികളെ സുനിലും ഡ്രൈവറും തിരിച്ചറിഞ്ഞിട്ടുണ്ട്. മണ്ണൂത്തി സ്വദേശി സിജോ നൽകിയ ക്വട്ടേഷനാണ് ഇവർ ഏറ്റെടുത്തതെന്നാണ് പോലീസിന് ലഭിച്ച പ്രാഥമിക വിവരം. തന്നെ ആക്രമിച്ചതിനു പിന്നിൽ പ്രവാസി വ്യവസായിയായ റാഫേൽ ആണെന്നാണ് സുനിൽ ആരോപിക്കുന്നത്. സിനിമയുടെ വിതരണവുമായി ബന്ധപ്പെട്ട് വ്യവസായിയുമായി തർക്കം നിലനിന്നിരുന്നു.
ഒരു വർഷം മുമ്പ് സിജോ തിയേറ്ററിലെത്തി ഭീഷണി മുഴക്കിയിരുന്നു. അന്ന് നൽകിയ കേസിൽ സിജോയും റാഫേലും പ്രതികളാണ്. അതിന്റെ തുടർച്ചയാണ് ഇപ്പോഴത്തെ ആക്രമണമെന്നും സുനിൽ പറഞ്ഞു. സംഭവവുമായി ബന്ധപ്പെട്ട് ഇതുവരെ ആറുപേരെയാണ് പോലീസ് അറസ്റ്റ് ചെയ്തിട്ടുള്ളത്. ആക്രമണത്തിൽ നേരിട്ട് പങ്കെടുത്ത ഒരാൾ കൂടി ഇനി കസ്റ്റഡിയിലാകാനുണ്ട്. ഇയാളെ വൈകാതെ പിടികൂടുമെന്ന് പോലീസ് അറിയിച്ചു. എന്നാൽ, സുനിലിന്റെ ആരോപണത്തിൽ പ്രവാസി വ്യവസായിയെ ഇതുവരെ പോലീസ് പ്രതി ചേർത്തിട്ടില്ല.