പി. ശ്രീരാമകൃഷ്ണന്റെ ഗൺമാന്റെ പക്കൽ നിന്ന് കാണാതായ പിസ്റ്റളും തിരയും അടങ്ങിയ ബാഗ് കണ്ടെത്തി
Nov 24, 2021, 09:49 IST
കായംകുളം: മുൻ സ്പീക്കറും നോർക്ക റൂട്സ് വൈസ് ചെയർമാനുമായ പി. ശ്രീരാമകൃഷ്ണന്റെ ഗൺമാന്റെ പക്കൽ നിന്ന് ബസ് യാത്രയ്ക്കിടെ കാണാതായ പിസ്റ്റളും 10 റൗണ്ട് തിരയും അടങ്ങിയ ബാഗ് കണ്ടെത്തി. പത്തനാപുരം സ്വദേശി ബാഗ് മാറി എടുത്തു കൊണ്ട് പോകുകയായിരുന്നുവെന്നും പിന്നീട് ഇതു കണ്ടെത്തിയതായുമാണ് പോലീസ് അറിയിച്ചത്. ഗണ്മാൻ കാസർഗോഡ് എആർ ക്യാന്പിലെ രാജേഷിന്റെ തോക്കും പത്തു വെടിയുണ്ടകളും, ആധാർ കാർഡ്, എടിഎം കാർഡ് ഉൾപ്പെടുന്ന രേഖകളും സൂക്ഷിച്ചിരുന്ന ബാഗാണ് കാണാതായത്.ഡ്രൈവർ സീറ്റിനോടു ചേർന്നുള്ള ലഗേജ് വയ്ക്കുന്ന കാബിനിലാണ് ബാഗ് സൂക്ഷിച്ചിരുന്നത്. കായംകുളം പോലീസിൽ പരാതി നൽകിയതിനെ തുടർന്ന് പോലീസ് നടത്തിയ അന്വേഷണത്തിലാണ് ബാഗ് കണ്ടെത്തിയത്.