മലപ്പുറം: ഏറെ കോളിളക്കം സൃഷ്ടിച്ച ഒതായി മനാഫ് വധക്കേസിൽ ഒന്നാം പ്രതിക്ക് ജീവപര്യന്തം തടവ് ശിക്ഷ. കേസിലെ ഒന്നാം പ്രതിയായ മാലങ്ങാടൻ ഷെഫീഖിന് മഞ്ചേരി അഡീഷണൽ ജില്ലാ സെഷൻസ് കോടതി ജീവപര്യന്തം തടവ് ശിക്ഷയും ഒരു ലക്ഷം രൂപ പിഴയും വിധിച്ചു. പിഴത്തുക കൊല്ലപ്പെട്ട മനാഫിന്റെ സഹോദരിയും കേസിലെ രണ്ടാം സാക്ഷിയുമായ ഫാത്തിമക്ക് നൽകണമെന്നും കോടതി ഉത്തരവിട്ടു.(Othayi Manaf murder case, Court sentences the first accused to life imprisonment and fine)
ഷെഫീഖ് പി.വി. അൻവറിന്റെ സഹോദരിയുടെ മകനാണ്. കേസിൽ ഒന്നാം പ്രതി കുറ്റക്കാരനാണെന്ന് കണ്ടെത്തിയ കോടതി, മറ്റ് മൂന്ന് പ്രതികളായ മാലങ്ങാടൻ ഷെരീഫ് (മൂന്നാം പ്രതി), നിലമ്പൂർ സ്വദേശി മുനീബ് (17-ാം പ്രതി), എളമരം സ്വദേശി കബീർ എന്ന ജാബിർ (19-ാം പ്രതി) എന്നിവരെ വെറുതെ വിടുകയും ചെയ്തു.
ഓട്ടോറിക്ഷ ഡ്രൈവറായിരുന്ന മനാഫിനെ 1995 ഏപ്രിൽ 13-ന് ഒതായി അങ്ങാടിയിൽവെച്ച് അടിച്ചും കുത്തിയും കൊലപ്പെടുത്തിയെന്നാണ് കേസ്. കൊലപാതകത്തിനുശേഷം 25 വർഷത്തോളം ഒളിവിലായിരുന്ന നാല് പ്രതികളും മനാഫിന്റെ സഹോദരൻ അബ്ദുൽ റസാഖ് നടത്തിയ നിയമപോരാട്ടത്തിനൊടുവിലാണ് പിടിയിലായത്. കേസിൽ നേരത്തെ പി.വി. അൻവർ അടക്കമുള്ള 21 പ്രതികളെ കോടതി കുറ്റവിമുക്തരാക്കിയിരുന്നു. കൊലക്കുറ്റം തെളിഞ്ഞതായി കോടതി ചൂണ്ടിക്കാട്ടി.