കോഴിക്കോട്: തദ്ദേശ സ്വയംഭരണ തിരഞ്ഞെടുപ്പിന്റെ ആദ്യഘട്ടമിങ്ങ് എത്തിയിരിക്കെ, ജമാഅത്തെ ഇസ്ലാമി ബന്ധത്തെ ചൊല്ലി എൽ.ഡി.എഫും യു.ഡി.എഫും തമ്മിലുള്ള വാക്പോര് കൂടുതൽ രൂക്ഷമായി. ജമാഅത്തെ ഇസ്ലാമി നേതാക്കളുമായി താൻ ചർച്ച നടത്തിയിട്ടുണ്ടെന്ന് മുഖ്യമന്ത്രി പിണറായി വിജയൻ സമ്മതിച്ചപ്പോൾ, ഇത് പതിറ്റാണ്ടുകളായുള്ള ബന്ധമാണെന്നും മുഖ്യമന്ത്രി കള്ളം പറയുകയാണെന്നും പ്രതിപക്ഷ നേതാവ് വി.ഡി. സതീശൻ തിരിച്ചടിച്ചു.(Local body elections, Jamaat-e-Islami ties flare up again)
തദ്ദേശ തിരഞ്ഞെടുപ്പിന് മുന്നോടിയായി എറണാകുളത്തും തൃശ്ശൂരിലും നടത്തിയ വാർത്താസമ്മേളനത്തിൽ ജമാഅത്ത് ബന്ധം ആരോപിച്ച് മുഖ്യമന്ത്രി യു.ഡി.എഫിനെതിരെ കടുത്ത ആക്രമണം നടത്തിയതിനു പിന്നാലെയാണ്, പിണറായി ജമാഅത്തെ നേതാക്കളുമായി ചർച്ച നടത്തിയതിന്റെ ചിത്രങ്ങൾ പുറത്തുവന്നത്. ഇതോടെയാണ് കൂടിക്കാഴ്ചയെക്കുറിച്ച് മുഖ്യമന്ത്രി തുറന്നുപറഞ്ഞത്.
എ.കെ.ജി. സെന്ററിൽ വെച്ച് ജമാഅത്തെ നേതാക്കളുമായി ചർച്ച നടത്തിയിട്ടുണ്ടെന്ന് മുഖ്യമന്ത്രി സമ്മതിച്ചു. ജമാഅത്തെ നേതാക്കൾ ആവശ്യപ്പെട്ടത് പ്രകാരമായിരുന്നു കൂടിക്കാഴ്ചയെന്നും, 'വർഗീയവാദികൾ' എന്ന് അറിഞ്ഞുകൊണ്ട് തന്നെയായിരുന്നു ചർച്ച എന്നും അദ്ദേഹം വെളിപ്പെടുത്തി. എന്നാൽ, ഒരു ഘട്ടത്തിലും ഇവരുമായി തിരഞ്ഞെടുപ്പ് കൂട്ടുകെട്ട് ഉണ്ടാക്കിയിട്ടില്ലെന്നും മുഖ്യമന്ത്രി വ്യക്തമാക്കി.
ജമാഅത്തെ ഇസ്ലാമിയെ വർഗ്ഗീയ സംഘടനയായി യു.ഡി.എഫ്. സർക്കാർ തന്നെ പ്രഖ്യാപിച്ച ചരിത്രം മുഖ്യമന്ത്രി ചൂണ്ടിക്കാട്ടി. 1992-ൽ കോൺഗ്രസ് സർക്കാർ ജമാഅത്തെ ഇസ്ലാമിയെ നിരോധിച്ചു. 2014-ൽ ഉമ്മൻചാണ്ടി മുഖ്യമന്ത്രിയും രമേശ് ചെന്നിത്തല ആഭ്യന്തര മന്ത്രിയുമായിരിക്കെ, ജമാഅത്തെ ഇസ്ലാമി ഒരു വർഗ്ഗീയ സംഘടനയാണെന്ന് ഹൈക്കോടതിയിൽ സത്യവാങ്മൂലം സമർപ്പിച്ചു. അങ്ങനെയൊരു സംഘടനയ്ക്ക് എങ്ങനെയാണ് യു.ഡി.എഫ്. ഗുഡ് സർട്ടിഫിക്കറ്റ് കൊടുക്കുന്നതെന്നും പിണറായി ചോദിച്ചു.
മുഖ്യമന്ത്രിയുടെ വാദങ്ങളെ പ്രതിപക്ഷ നേതാക്കൾ ശക്തമായി തള്ളിക്കളഞ്ഞു. വെൽഫെയർ പാർട്ടിയാണ് യു.ഡി.എഫിന് പിന്തുണ പ്രഖ്യാപിച്ചത്, എന്നാൽ സി.പി.എം. ജമാഅത്തെ ഇസ്ലാമിയുമായി നേരിട്ടാണ് ചർച്ചകൾ നടത്തിയത്. മുഖ്യമന്ത്രി കള്ളമാണ് പറയുന്നത് എന്നാണ് വി ഡി സതീശൻ പറഞ്ഞത്.
സി.പി.എമ്മിന്റെ ചെയ്തികൾ സി.പി.എമ്മിനെ തന്നെ തിരിഞ്ഞുകൊത്തുകയാണ് എന്നാണ് രമേശ് ചെന്നിത്തല പറഞ്ഞത്. ജമാഅത്തെ ഇസ്ലാമിയെ കൊണ്ടുനടന്നത് സി.പി.എം. ആണ്. യു.ഡി.എഫിനെതിരെ അടിസ്ഥാനമില്ലാത്ത ആരോപണങ്ങളാണ് ഉന്നയിക്കുന്നത് എന്ന് പി.കെ. കുഞ്ഞാലിക്കുട്ടി ആരോപിച്ചു. നേരത്തെ, 2008-ലെ ലോക്സഭാ തിരഞ്ഞെടുപ്പ് ഘട്ടത്തിലും 2011-ലെ നിയമസഭാ തിരഞ്ഞെടുപ്പ് സമയത്തും പിണറായി വിജയനുമായി ചർച്ച നടത്തി എന്ന് ജമാഅത്തെ ഇസ്ലാമി നേതാക്കളും വെളിപ്പെടുത്തിയിരുന്നു.