തിരുവനന്തപുരം: കേശവദാസപുരം മനോരമ വധക്കേസിൽ കുറ്റക്കാരനാണെന്ന് കോടതി കണ്ടെത്തിയ പ്രതി, കോടതി മുറിയിൽനിന്ന് ഇറങ്ങിയോടി. ബംഗാൾ സ്വദേശിയായ ആദം അലിയാണ് നാടകീയമായി രക്ഷപ്പെടാൻ ശ്രമിച്ചത്. കോടതിയിൽനിന്ന് ഓടിയ പ്രതിയെ അഭിഭാഷകരും പോലീസും ചേർന്ന് ഓടിച്ചിട്ട് പിടികൂടുകയായിരുന്നു.(Kesavadasapuram Manorama murder case, Accused flees courtroom after being found guilty; chased and caught)
ശിക്ഷാവിധി സംബന്ധിച്ച വാദം ഉച്ചയ്ക്ക് രണ്ട് മണിക്ക് നടക്കാനിരിക്കെയാണ് പ്രതി കോടതി വളപ്പിൽനിന്ന് ഓടി രക്ഷപ്പെടാൻ ശ്രമിച്ചത്. മനോരമയുടെ തൊട്ടടുത്ത വീട്ടിൽ വീട്ടുജോലിക്കായി എത്തിയിരുന്ന ആളാണ് ആദം അലി.
2022-ലാണ് കേസിനാസ്പദമായ സംഭവം. കൊല്ലപ്പെട്ട മനോരമയുടെ ആഭരണങ്ങൾ നഷ്ടപ്പെട്ട നിലയിൽ കണ്ടെത്തിയതോടെ മോഷണത്തിനുവേണ്ടിയുള്ള കൊലപാതകമാണെന്ന നിഗമനത്തിൽ പോലീസ് എത്തി. പ്രതി കഴുത്ത് ഞെരിച്ചാണ് മനോരമയെ കൊലപ്പെടുത്തിയത്. കൊലപാതകത്തിന് ശേഷം മൃതദേഹം തൊട്ടടുത്ത പുരയിടത്തിലേക്ക് കൊണ്ടുപോയതും അവിടുത്തെ കിണറ്റിലേക്ക് തള്ളിയിട്ടതും ആദം അലി ഒറ്റയ്ക്കാണ്.
മൃതദേഹം ചുമന്നുകൊണ്ടുപോയ ശേഷം കാലിൽ കല്ല് ചേർത്ത് കെട്ടി കിണറ്റിലേക്ക് ഇടുന്നതിന്റെ സി.സി.ടി.വി. ദൃശ്യങ്ങളാണ് കേസിൽ നിർണായകമായത്. കൊലപാതകത്തിന് ശേഷം ട്രെയിൻ മാർഗം കേരളം വിട്ട പ്രതിയെ ചെന്നൈ റെയിൽവേ സ്റ്റേഷനിൽവെച്ച് ആർ.പി.എഫ്. ആണ് പിടികൂടിയത്. 2022-ൽ അറസ്റ്റ് ചെയ്യുമ്പോഴും ആദം അലി രക്ഷപ്പെടാൻ ശ്രമിച്ചിരുന്നു. എന്നും കണ്ട് പരിചയമുള്ള ആളായതിനാൽ പ്രതിക്ക് പെട്ടെന്ന് മനോരമയുടെ വീട്ടിനുള്ളിലേക്ക് കടക്കാൻ സാധിച്ചു.