പാലക്കാട്: യുവതിയുടെ ബലാൽസംഗ പരാതിയിൽ പ്രതിസ്ഥാനത്തുള്ള രാഹുൽ മാങ്കൂട്ടത്തിൽ ഇപ്പോഴും ഒളിവിലാണ്. കേസിന്റെ അന്വേഷണം ഊർജിതമാക്കിക്കൊണ്ട് പോലീസ് ഇന്ന് മുതൽ സാക്ഷിമൊഴികൾ രേഖപ്പെടുത്തി തുടങ്ങും. അതേസമയം, ഒളിവിലിരുന്ന് രാഹുൽ നൽകിയ മുൻകൂർ ജാമ്യാപേക്ഷ തിങ്കളാഴ്ച ജില്ലാ സെഷൻസ് കോടതി പരിഗണിക്കും.(Is Rahul Mamkootathil in a secret center in Palakkad?)
കേസിൽ നിർണായകമായേക്കാവുന്ന സാക്ഷി മൊഴികളാണ് അന്വേഷണ സംഘം ഇന്ന് രേഖപ്പെടുത്തുക. ഗർഭഛിദ്രത്തിനായുള്ള ഗുളിക കഴിച്ചതിനെ തുടർന്ന് ശാരീരിക പ്രശ്നങ്ങളുണ്ടായ പരാതിക്കാരിയെ ചികിത്സിച്ച ഡോക്ടറുടെ മൊഴി ഇന്ന് രേഖപ്പെടുത്തും. പെൺകുട്ടികളുടെ സുഹൃത്തുക്കളുടെ മൊഴിയും ഇന്ന് അന്വേഷണ സംഘം രേഖപ്പെടുത്തുന്നുണ്ട്. ഇന്നലെ പരാതിക്കാരിയുടെ രഹസ്യമൊഴി രേഖപ്പെടുത്തുകയും വൈദ്യപരിശോധന പൂർത്തിയാക്കുകയും ചെയ്തിരുന്നു.
പ്രതിയായ രാഹുൽ മാങ്കൂട്ടത്തിൽ സംസ്ഥാനം വിട്ടെന്ന വാർത്തകൾ പുറത്തുവന്നിരുന്നെങ്കിലും, നിലവിൽ ഇയാൾ പാലക്കാട്ടെ ഒരു രഹസ്യ കേന്ദ്രത്തിലേക്ക് മാറിയെന്നാണ് പോലീസിന് ലഭിക്കുന്ന സൂചന. വെള്ളിയാഴ്ച രാവിലെ കുറഞ്ഞ സമയം മൊബൈൽ ഫോൺ ഓൺ ചെയ്തത് മുൻകൂർ ജാമ്യഹർജി നൽകുന്നതുമായി ബന്ധപ്പെട്ട് അഭിഭാഷകനുമായി സംസാരിക്കാനാണ് എന്നാണ് വിവരം. ഇതിനുശേഷം ഫോൺ വീണ്ടും ഓഫ് ചെയ്യുകയായിരുന്നു. പാലക്കാട് ജില്ല വിടുന്നത് മുൻകൂർ ജാമ്യത്തെ ബാധിക്കുമെന്ന് രാഹുലിന് നിയമോപദേശം ലഭിച്ചതായും റിപ്പോർട്ടുകളുണ്ട്.
എംഎൽഎയുടെ ഔദ്യോഗിക വാഹനം താമസിക്കുന്ന ഫ്ലാറ്റിൽ തന്നെയാണുള്ളതെന്നും, അവിടെ നിന്നും സുഹൃത്തിന്റെ വാഹനത്തിലാണ് രാഹുൽ ഒളിവിൽ പോയതെന്നുമാണ് വിവരം. തിരുവനന്തപുരം ജില്ലാ സെഷൻസ് കോടതിയിൽ നൽകിയിട്ടുള്ള മുൻകൂർ ജാമ്യ ഹർജിയിൽ രാഹുൽ മാങ്കൂട്ടത്തിൽ പീഡനാരോപണം പൂർണ്ണമായും നിഷേധിക്കുന്നു. പരാതി നൽകിയ യുവതിയുമായി ദീർഘകാലമായി സൗഹൃദ ബന്ധമുണ്ടായിരുന്നതായി ഹർജിയിൽ പറയുന്നു.
ബലാത്സംഗം ചെയ്യുകയോ ഗർഭഛിദ്രത്തിന് നിർബന്ധിക്കുകയോ ചെയ്തിട്ടില്ല. യുവതിയുടെ ആരോപണങ്ങൾ കെട്ടിച്ചമച്ചതാണെന്നും ഹർജിയിൽ വാദിക്കുന്നു. പോലീസിന്റെ അതിവേഗത്തിലുള്ള നീക്കത്തിന് പിന്നിൽ രാഷ്ട്രീയ ലക്ഷ്യങ്ങളുണ്ടെന്നും, അന്വേഷണവുമായി സഹകരിക്കാൻ തയ്യാറാണെന്നും രാഹുൽ ജാമ്യാപേക്ഷയിൽ വ്യക്തമാക്കിയിട്ടുണ്ട്. ജാമ്യാപേക്ഷ തിങ്കളാഴ്ച കോടതി പരിഗണിക്കുന്നതോടെ കേസിൽ നിർണ്ണായക വഴിത്തിരിവുണ്ടാകുമെന്നാണ് പ്രതീക്ഷിക്കുന്നത്.