കൊല്ലം: പുനലൂർ കാര്യറ സ്വദേശിനി കലാസൂര്യയും മൂന്നാം ഭർത്താവ് തമിഴ്നാട് ഭഗവതിപുരം സ്വദേശി കണ്ണനും രണ്ട് വയസുകാരിയായ പെൺകുട്ടിയെ കൊലപ്പെടുത്തിയ കേസിൽ അറസ്റ്റിൽ. കുട്ടിയുടെ മുത്തശ്ശി നൽകിയ പരാതിയാണ് ക്രൂരമായ കൊലപാതകത്തിന്റെ ചുരുളഴിച്ചത്. ഡിസംബർ രണ്ടിനാണ് കലാസൂര്യയുടെ മാതാവ് സന്ധ്യ, പേരക്കുട്ടിയും രണ്ട് വയസുകാരിയുമായ അനശ്വരയെ കാണാനില്ലെന്ന് കാട്ടി പുനലൂർ പോലീസിൽ പരാതി നൽകിയത്. തുടർന്ന് പോലീസ് നടത്തിയ അന്വേഷണമാണ് കൊലപാതകത്തിന്റെ ചുരുളഴിച്ചത്.(Grandmother's complaint unravels 2-year-old girl's murder, Mother and her third husband arrested)
പുനലൂരിലെ ബന്ധുവീട്ടിൽ കഴിഞ്ഞിരുന്ന കലാസൂര്യയെ പോലീസ് ചോദ്യം ചെയ്തതോടെയാണ് കൊലപാതക വിവരം പുറത്തുവന്നത്. കുട്ടിയെ തമിഴ്നാട്ടിലെ അനാഥാലയത്തിലാക്കി എന്നാണ് യുവതി ആദ്യം മൊഴി നൽകിയത്. പിന്നീട് ഭർത്താവിന്റെ മാതാവ് കുട്ടിയെ കൂട്ടിക്കൊണ്ടുപോയി എന്നും യുവതി മാറ്റിപ്പറഞ്ഞു. പരസ്പര വിരുദ്ധമായ മൊഴികളാണ് കലാസൂര്യയെ കുടുക്കിയത്. വിശദമായ ചോദ്യം ചെയ്യലിൽ, മൂന്നാം ഭർത്താവ് കണ്ണനാണ് കുട്ടിയെ കൊലപ്പെടുത്തിയതെന്ന് യുവതി വെളിപ്പെടുത്തുകയായിരുന്നു.
കലാസൂര്യയുടെ രണ്ടാം ഭർത്താവിന്റെ മകളാണ് കൊല്ലപ്പെട്ട അനശ്വര. കണ്ണനൊപ്പം തമിഴ്നാട്ടിലെ മധുര ചെക്കാനൂരിലുള്ള ഒരു കോഴിഫാമിൽ ജോലി ചെയ്തുവരുന്നതിനിടെയാണ് കൊലപാതകം നടന്നത്. തന്റെ കുട്ടിയല്ലാത്തതിനാൽ കണ്ണൻ അനശ്വരയെ സ്ഥിരമായി മർദ്ദിക്കുമായിരുന്നുവെന്ന് കലാസൂര്യ പോലീസിനോട് പറഞ്ഞു. കണ്ണന്റെ മാതാവ് രാസാത്തിയും കുട്ടിയെ ഉപദ്രവിച്ചിരുന്നതായി മൊഴിയിലുണ്ട്. മദ്യലഹരിയിൽ കണ്ണൻ മർദ്ദിക്കുന്നതിനിടെയാണ് കുട്ടി മരിച്ചത്. തുടർന്ന് മൃതദേഹം കലാസൂര്യയും കണ്ണനും ചേർന്നാണ് മറവ് ചെയ്തതെന്നാണ് പോലീസിന്റെ കണ്ടെത്തൽ.
കൊലപാതകം നടന്നത് തമിഴ്നാട്ടിലായതിനാൽ കേരള പോലീസ് ചെക്കാനുരണി പോലീസിനെ വിവരമറിയിച്ചു. തുടർന്ന് കണ്ണനെ തമിഴ്നാട് പോലീസ് പിടികൂടി. കലാസൂര്യയെയും തമിഴ്നാട് പോലീസിന് കൈമാറി. ഇരുവരെയും അറസ്റ്റ് ചെയ്ത് ജയിലിലടച്ചു.