കോഴിക്കോട്: ബേബി മെമ്മോറിയൽ ആശുപത്രിയിൽ ഉണ്ടായ തീപിടിത്തം പൂർണമായും നിയന്ത്രണവിധേയമായി. ആശുപത്രിയിലെ സി ബ്ലോക്കിലെ ഒമ്പതാം നിലയിൽ, എയർ കണ്ടീഷണറിന്റെ യന്ത്രഭാഗങ്ങൾ സൂക്ഷിക്കുന്നിടത്താണ് തീപിടിത്തമുണ്ടായത്. തീപിടിത്തത്തിൽ ആർക്കും പരിക്കേൽക്കുകയോ ആളപായം സംഭവിക്കുകയോ ചെയ്തിട്ടില്ലെന്ന് അധികൃതർ അറിയിച്ചു.(Fire breaks out during AC installation at Baby Memorial Hospital in Kozhikode)
തീപിടിത്തത്തിന്റെ കാരണം സംബന്ധിച്ച് ഫയർഫോഴ്‌സ് വ്യക്തത വരുത്തിയിട്ടുണ്ട്. ഒമ്പതാം നിലയിലെ ടെറസ്സിൽ എ.സി. ചില്ലർ പ്ലാന്റ് സ്ഥാപിക്കുന്നതിനിടെ വെൽഡിങ് ജോലിക്കിടെ തീപ്പൊരി വീണതാണ് തീപിടിത്തത്തിന് കാരണമായതെന്ന് റീജ്യണൽ ഫയർ ഓഫീസർ ടി. രജീഷ് അറിയിച്ചു. തെർമോകോൾ കവറിനാണ് തീ പിടിച്ചത്. ആശുപത്രിയിലെ സംവിധാനങ്ങൾ ഉപയോഗിച്ച് തന്നെ ഉടൻ തീയണക്കാൻ കഴിഞ്ഞതിനാൽ കാര്യമായ നാശനഷ്ടം ഉണ്ടായില്ല.
ഒമ്പതാം നിലയിൽ നിന്ന് വലിയ രീതിയിൽ തീയും പുകയും ഉയരുന്ന ദൃശ്യങ്ങൾ പുറത്തുവന്നിരുന്നു. എന്നാൽ, രോഗികളെ മുഴുവൻ വേഗത്തിൽ മാറ്റിയതും തീ പെട്ടെന്ന് അണച്ചതുമാണ് വലിയ അപകടം ഒഴിവാക്കിയത്. എ.സി. ചില്ലർ ഇൻസ്റ്റലേഷൻ നടക്കുന്നതിനിടെയാണ് തീ പടർന്നതെന്നും, ഉടൻ തന്നെ ജീവനക്കാർ തീയണച്ചെന്നും ആശുപത്രി എ.ജി.എം.പി.ആർ. സലിൽ ശങ്കർ അറിയിച്ചു. ഫയർഫോഴ്‌സ് എത്തും മുമ്പേ തീ അണച്ചിരുന്നു. നിയമപ്രകാരമാണ് എ.സി. ഭാഗങ്ങൾ സ്ഥാപിച്ചിരിക്കുന്നതെന്നും ആശങ്കപ്പെടേണ്ട സാഹചര്യമില്ലെന്നും ആശുപത്രി അധികൃതർ വ്യക്തമാക്കി.
മുൻകരുതൽ എന്ന നിലയിലാണ് എട്ടാം നിലയിലടക്കമുള്ള രോഗികളെയും കൂടെയുണ്ടായിരുന്നവരെയും ജീവനക്കാരെയും മാറ്റിപ്പാർപ്പിച്ചത്. ജീവനക്കാർക്കൊപ്പം രോഗികൾക്കൊപ്പമുണ്ടായിരുന്നവരും രക്ഷാപ്രവർത്തനത്തിൽ പങ്കാളികളായിരുന്നു. ആളപായമില്ലെന്നും തീ വേഗത്തിൽ നിയന്ത്രണവിധേയമാക്കിയെന്നും എം.കെ. രാഘവൻ എം.പി. പ്രതികരിച്ചു.
തീപിടിത്തത്തെ തുടർന്ന് ആരോഗ്യവകുപ്പ് മന്ത്രി വീണാ ജോർജ് ബേബി മെമ്മോറിയൽ ആശുപത്രി അധികൃതരുമായി സംസാരിച്ചു. രോഗികളെല്ലാം സുരക്ഷിതരാണെന്ന് ആശുപത്രി അധികൃതർ മന്ത്രിയെ അറിയിച്ചു. രോഗികളെ ഷിഫ്റ്റ് ചെയ്യേണ്ട ആവശ്യം വന്നാൽ കോഴിക്കോട് മെഡിക്കൽ കോളേജിൽ ഐ.സി.യു., വെന്റിലേറ്റർ സൗകര്യങ്ങൾ ഒരുക്കാനുള്ള നിർദേശവും മന്ത്രി നൽകിയിരുന്നു. നിലവിൽ തീ പൂർണ്ണമായും നിയന്ത്രണവിധേയമാക്കുകയും രോഗികളെ മുഴുവനായും ആശുപത്രിയിലേക്ക് തിരിച്ചെത്തിക്കുകയും ചെയ്തിട്ടുണ്ട്. ആശുപത്രി പ്രവർത്തനം പൂർണതോതിൽ പുനരാരംഭിച്ചു.