എറണാകുളം : പള്ളുരുത്തിയില് കള്ളവോട്ട് ചെയ്യാന് ശ്രമിച്ച സിപിഎം പ്രവര്ത്തകന് പിടിയില്. നമ്പ്യാപുരത്ത് കള്ളവോട്ടിന് ശ്രമിച്ച ജിന്സനാണ് പൊലീസിന്റെ പിടിയിലായത്. ഇതിന് പിന്നാലെ പ്രദേശത്ത് സംഘര്ഷാവസ്ഥ തുടരുകയാണ്.ഇടുക്കിയിലെ വട്ടവട പഞ്ചായത്തിലെ കടവരി വാര്ഡിലും കള്ളവോട്ടിനെ ചൊല്ലി ബിജെപി- സിപിഎം സംഘര്ഷം നടന്നിരുന്നു.
അതേ സമയം, തദ്ദേശ തിരഞ്ഞെടുപ്പിലെ ആദ്യഘട്ട വോട്ടെടുപ്പ് അവസാനിച്ചു. ചൊവ്വാഴ്ച ഏഴുജില്ലകളിലായി നടന്ന വോട്ടെടുപ്പില് ആറുമണി വരെയുള്ള കണക്കുകള്പ്രകാരം 69.52 ശതമാനം പോളിങ് രേഖപ്പെടുത്തി. വൈകീട്ട് ആറുമണിവരെയുള്ള കണക്കനുസരിച്ച് എറണാകുളം ജില്ലയിലാണ് ഏറ്റവും കൂടുതല് പോളിങ്(73.36%). ആലപ്പുഴയില് 72.74 ശതമാനവും ഇടുക്കിയില് 70.26 ശതമാനവും പോളിങ് രേഖപ്പെടുത്തി. തിരുവനന്തപുരം- 65.93% കൊല്ലം-69.32% പത്തനംതിട്ട-65.91% കോട്ടയം-69.77% എന്നിങ്ങനെയാണ് മറ്റുജില്ലകളിലെ പോളിങ്.
മൂന്ന് കോർപ്പറേഷനുകൾ 39 മുൻസിപ്പാലിറ്റികൾ, ഏഴ് ജില്ലാ പഞ്ചായത്തുകൾ, 75 ബ്ലോക്ക് പഞ്ചായത്തുകൾ, 471 ഗ്രാമപഞ്ചായത്തുകൾ എന്നിവിടങ്ങളിലേക്കാണ് ഇന്ന് ജനവിധി. 11168 വാർഡുകളിലേയ്ക്കാണ് തെരഞ്ഞെടുപ്പ്.വൈകീട്ട് ആറുമണിയോടെ വോട്ടെടുപ്പ് സമയം അവസാനിച്ചെങ്കിലും ക്യൂവിലുള്ളവര്ക്ക് വോട്ട് ചെയ്യാന് അവസരമുണ്ടായി