തിരുവനന്തപുരം: ശബരിമല സ്വർണ്ണക്കൊള്ളയിൽനിന്ന് ശ്രദ്ധ തിരിക്കാനായി മറ്റ് വിഷയങ്ങൾ ഉയർത്തിക്കൊണ്ടുവന്നാൽ അതിൽ കോൺഗ്രസ് വീഴില്ലെന്ന് പ്രതിപക്ഷ നേതാവ് വി.ഡി. സതീശൻ വ്യക്തമാക്കി. രാഹുൽ മാങ്കൂട്ടത്തിൽ എം.എൽ.എ.യുടെ വിഷയത്തിൽ പാർട്ടി നിലപാട് കെ.പി.സി.സി. പ്രസിഡന്റ് വ്യക്തമാക്കിയിട്ടുണ്ടെന്നും അദ്ദേഹം പറഞ്ഞു.(Congress has taken a proud decision, VD Satheesan on Rahul Mamkootathil issue)
ആരോപണം ഉയർന്നപ്പോൾത്തന്നെ നടപടിയെടുത്ത പാർട്ടിയാണ് കോൺഗ്രസ്. ഒരു വിഷയത്തിൽ ഒരാൾക്കെതിരെ ഒരു നടപടി മാത്രമാണ് എടുക്കാനാകുക; രണ്ടു പ്രാവശ്യം നടപടിയെടുക്കാനാകില്ല. കോൺഗ്രസ് എടുത്തത് അഭിമാനകരമായ തീരുമാനമാണ് എന്നും സതീശൻ പറഞ്ഞു. പോലീസ് ജീപ്പിന് നേരെ ബോംബ് എറിഞ്ഞ കേസിൽ ശിക്ഷിക്കപ്പെട്ടയാൾ പയ്യന്നൂരിൽ സ്ഥാനാർത്ഥിയായതിനെ ചൂണ്ടിക്കാട്ടി, സി.പി.എം. ക്രിമിനലുകളെ പ്രോത്സാഹിപ്പിക്കുകയാണെന്ന് സതീശൻ വിമർശിച്ചു. ഡി.വൈ.എഫ്.ഐ. ധാർമികതയെക്കുറിച്ച് പറയുന്നതിലെ ഇരട്ടത്താപ്പ് അദ്ദേഹം എടുത്തുപറഞ്ഞു.
"നല്ല കമ്മ്യൂണിസ്റ്റുകാരെ കണ്ടാൽ യു.ഡി.എഫുകാർ ചിരിക്കാൻ മറക്കണ്ട. അവരുടെ വോട്ട് ഇത്തവണ യു.ഡി.എഫിനുള്ളതാണ്," എന്ന് പരിഹസിച്ച വി.ഡി. സതീശൻ, പിണറായി വിജയൻ കേരളത്തിലെ അവസാനത്തെ കമ്യൂണിസ്റ്റ് മുഖ്യമന്ത്രിയാകും എന്നും പറഞ്ഞു.
കെ.പി.സി.സി. അധ്യക്ഷൻ സണ്ണി ജോസഫും ശബരിമലയിലെ സ്വർണ്ണക്കൊള്ളയാണ് കേരളത്തിലെ ജനങ്ങളെ ബാധിക്കുന്ന പ്രധാന പ്രശ്‌നമെന്ന് ചൂണ്ടിക്കാട്ടി. സ്വർണ്ണ മോഷണ കേസിലെ മുഴുവൻ പ്രതികളെയും ഇതുവരെ കണ്ടെത്തിയിട്ടില്ലെന്നും നഷ്ടപ്പെട്ട സ്വർണ്ണം എത്രയെന്ന് തിട്ടപ്പെടുത്തിയിട്ടില്ലെന്നും അദ്ദേഹം ആരോപിച്ചു. പ്രമുഖരായ പ്രതികളിലേക്ക് ഇനിയും എത്തിയിട്ടില്ലെന്നും, ജയിലിൽ കഴിയുന്ന പ്രതികളെ പാർട്ടിയും ഗവൺമെന്റും സംരക്ഷിച്ചുകൊണ്ടിരിക്കുകയാണെന്നും അദ്ദേഹം പറഞ്ഞു.
രാഹുലിനെതിരെ ആക്ഷേപം ഉയർന്നപ്പോൾത്തന്നെ പാർട്ടിയിൽനിന്ന് സസ്‌പെൻഡ് ചെയ്തു. പാർലമെന്ററി പാർട്ടിയിൽനിന്നും പുറത്താക്കി സ്പീക്കർക്ക് കത്ത് നൽകി. കഴിഞ്ഞ നിയമസഭയിൽ പ്രതിപക്ഷ എം.എൽ.എമാർക്കൊപ്പമല്ല രാഹുൽ ഇരുന്നതെന്നും അദ്ദേഹം ഓർമ്മിപ്പിച്ചു. നിയമം നിയമത്തിന്റെ വഴിക്ക് പോകുമെന്നും, മുൻകൂർ ജാമ്യാപേക്ഷ നൽകിയത് നിയമത്തിന്റെ വഴി സ്വീകരിക്കാനാണ് മാധ്യമങ്ങളിൽനിന്ന് അറിഞ്ഞതെന്നും സണ്ണി ജോസഫ് പറഞ്ഞു. ബലാൽസംഗ കേസിൽ പ്രതിയായ മുകേഷ് എം.എൽ.എ. ഭരണകക്ഷി ബെഞ്ചിലിരുന്ന് പ്രസംഗിക്കുന്നതിലെ ധാർമികതയില്ലായ്മ അദ്ദേഹം ചൂണ്ടിക്കാട്ടി. 'വീക്ഷണം' പത്രത്തിലെ ലേഖനങ്ങൾ സംബന്ധിച്ച് പരിശോധിക്കുമെന്നും അദ്ദേഹം കൂട്ടിച്ചേർത്തു.