എറണാകുളം: ചേന്ദമംഗലത്ത് സ്വതന്ത്ര സ്ഥാനാർത്ഥിയായ ഫസൽ റഹ്മാന് കുത്തേറ്റു. വോട്ട് ചോദിച്ചുള്ള പ്രചാരണം നടത്തുന്നതിനിടെയാണ് ഫസൽ റഹ്മാനെ കുത്തിപ്പരിക്കേൽപ്പിച്ചത്. സംഭവവുമായി ബന്ധപ്പെട്ട് വടക്കേക്കര സ്വദേശിയായ മനോജിനെ പോലീസ് അറസ്റ്റ് ചെയ്തു.(Candidate expelled from CPM stabbed, Suspect arrested)
ഫസൽ റഹ്മാന്റെ പുറത്താണ് മനോജ് മൂന്നു തവണ കുത്തിയത്. കുത്തേറ്റ ഫസൽ റഹ്മാൻ ആശുപത്രിയിൽ ചികിത്സയിലാണ്. സി.പി.എം. ബ്രാഞ്ച് സെക്രട്ടറിയായിരുന്ന ഫസൽ, കഴിഞ്ഞ ഭരണസമിതിയിൽ പഞ്ചായത്ത് അംഗമായിരുന്നു. ഇത്തവണ സീറ്റ് നിഷേധിച്ചതിൽ പ്രതിഷേധിച്ച് സ്വതന്ത്രനായാണ് മത്സരിച്ചത്. കഴിഞ്ഞ ദിവസമാണ് ഫസലിനെ പാർട്ടിയിൽനിന്ന് പുറത്താക്കിയത്.
മനോജും ഫസൽ റഹ്മാനും തമ്മിൽ നേരത്തെ പ്രശ്‌നങ്ങളുണ്ടായിരുന്നുവെന്ന് പോലീസ് പറയുന്നു. പഞ്ചായത്തിൽ വ്യവസായം തുടങ്ങുന്നതുമായി ബന്ധപ്പെട്ട് ഇരുവരും തമ്മിൽ തർക്കങ്ങൾ നിലനിന്നിരുന്നു. കഴിഞ്ഞ ദിവസം ഫസലിനെതിരെ ആരോപണം ഉന്നയിച്ച് മനോജ് ഫേസ്ബുക്ക് പോസ്റ്റിട്ടിരുന്നു. ഇതിനുശേഷം ഇരുവരും തമ്മിൽ തർക്കങ്ങളുണ്ടായി. ഇതിനിടെയാണ് മനോജ് ഫസൽ റഹ്മാനെ കുത്തിപ്പരിക്കേൽപ്പിച്ചത്. വ്യക്തിപരമായ വൈരാഗ്യമാണോ രാഷ്ട്രീയ പകയാണോ ആക്രമണത്തിന് പിന്നിലെന്ന് പോലീസ് വിശദമായി അന്വേഷിച്ചുവരികയാണ്.