ഇടുക്കി: മൂന്നാറിന് സമീപം ആനച്ചാലിലെ സ്വകാര്യ സ്കൈ ഡൈനിങ് കേന്ദ്രത്തിൽ ക്രെയിനിന്റെ സാങ്കേതിക തകരാർ കാരണം കുടുങ്ങിയ വിനോദസഞ്ചാരികളെ എല്ലാവരെയും സുരക്ഷിതമായി താഴെയെത്തിച്ചു. കണ്ണൂരിൽ നിന്നുള്ള നാലംഗ കുടുംബവും സ്കൈ ഡൈനിങ്ങിലെ ജീവനക്കാരനുമുൾപ്പെടെ കുടുങ്ങിയ അഞ്ച് പേരെയും രക്ഷപ്പെടുത്തി.(All tourists trapped at Idukki Sky Dining safely brought down)
രണ്ടര വയസ്സുള്ള കുട്ടിയടക്കമുള്ളവരെയാണ് ആദ്യം താഴെയിറക്കിയത്. എല്ലാവരും സുരക്ഷിതരാണ്. ക്രെയിൻ ഉപയോഗിച്ച് 120 അടി ഉയരത്തിൽ ഉയർത്തിയിരുന്ന ഡൈനിങ് പ്ലാറ്റ്‌ഫോം, ക്രെയിനിന്റെ സാങ്കേതിക തകരാർ കാരണം താഴ്ത്താൻ കഴിയാതിരുന്നതാണ് പ്രശ്നമായത്.
സാഹസിക ടൂറിസത്തിന്റെ ഭാഗമായി തുടങ്ങിയ ഈ പദ്ധതിയിൽ ഒരേസമയം 15 പേർക്ക് ആകാശക്കാഴ്ച ആസ്വദിച്ച് ഭക്ഷണം കഴിക്കാൻ സൗകര്യമുണ്ട്. ഒന്നരമണിക്കൂറിലേറെ നീണ്ട ആശങ്കകൾക്കൊടുവിലാണ് രക്ഷാദൗത്യം പൂർത്തിയാക്കിയത്.