കൊച്ചി: നടിയെ ആക്രമിച്ച കേസിലെ മൂന്നാം പ്രതിയായ മണികണ്ഠൻ ആത്മഹത്യാ ശ്രമം നടത്തി. ഇന്ന് പുലർച്ചെ മദ്യലഹരിയിൽ കൈ ഞരമ്പ് മുറിച്ചതിനെ തുടർന്ന് ഇയാളെ ആശുപത്രിയിൽ പ്രവേശിപ്പിച്ചു. മദ്യപിച്ച് പ്രശ്‌നങ്ങളുണ്ടാക്കിയതിന് പാലാരിവട്ടം പോലീസ് കസ്റ്റഡിയിലെടുത്ത് വിട്ടയച്ചതിന് പിന്നാലെയാണ് മണികണ്ഠൻ കടയിൽനിന്ന് ബ്ലേഡ് വാങ്ങി ഞരമ്പ് മുറിച്ചത്. ചികിത്സ നൽകിയ ശേഷം ഇയാളെ പോലീസ് വീട്ടിലേക്ക് പറഞ്ഞയച്ചു.(Actress assault case, Third accused attempts suicide)
അതിനിടെ, ഏറെ കോളിളക്കം സൃഷ്ടിച്ച ഈ കേസിൽ എറണാകുളം പ്രിൻസിപ്പൽ സെഷൻസ് കോടതി വിധി പ്രഖ്യാപിക്കുന്ന തീയതി തീരുമാനിച്ചു. ഡിസംബർ 8-നാണ് കേസിൽ വിധി പ്രഖ്യാപിക്കുക. പൾസർ സുനി ഒന്നാം പ്രതിയായ കേസിൽ നടൻ ദിലീപാണ് എട്ടാം പ്രതി. വിചാരണക്കിടെ കേസിൽ 28 സാക്ഷികൾ കൂറുമാറിയിരുന്നു.
2017 ഫെബ്രുവരി 17-ന് രാത്രിയിലാണ് കൊച്ചി നഗരത്തിലൂടെ ഓടിക്കൊണ്ടിരുന്ന വാഹനത്തിൽ നടി ആക്രമിക്കപ്പെട്ടത്. നടൻ ദിലീപ് ഉൾപ്പെടെ ഒമ്പത് പേരാണ് കേസിൽ പ്രതികൾ. കേസിൽ അറസ്റ്റിലായ ദിലീപിന് 2017 ഒക്ടോബർ 3-ന് കർശന ഉപാധികളോടെ ജാമ്യം ലഭിച്ചു. 2017 ഫെബ്രുവരിയിൽ അറസ്റ്റിലായ ഒന്നാം പ്രതി പൾസർ സുനിക്ക്, വിചാരണ വൈകുന്നതിൽ സുപ്രീം കോടതി അതൃപ്തി രേഖപ്പെടുത്തിയതിനെത്തുടർന്ന് കഴിഞ്ഞ വർഷം സെപ്റ്റംബറിൽ ജാമ്യം ലഭിച്ചിരുന്നു.
പിന്നീട് 2021 ഡിസംബറിൽ ബാലചന്ദ്രകുമാറിന്റെ രംഗപ്രവേശനത്തോടെ ദിലീപിനെതിരെ തുടരന്വേഷണം ആരംഭിച്ചു. 2023 ഓഗസ്റ്റ് 21-ന്, ദൃശ്യങ്ങൾ അടങ്ങിയ മെമ്മറി കാർഡിന്റെ ഹാഷ് വാല്യു മാറിയതുമായി ബന്ധപ്പെട്ട അതിജീവിതയുടെ ആവശ്യം പരിഗണിച്ച് ഹൈക്കോടതി ജില്ലാ ജഡ്ജിയുടെ മേൽനോട്ടത്തിൽ അന്വേഷണം നടത്താൻ ഉത്തരവിട്ടു. വിചാരണ നടപടികൾ നീണ്ടുപോയതിനെ തുടർന്ന് 2024 ഡിസംബർ 14-ന് അതിജീവിത രാഷ്ട്രപതിക്ക് ദയാ ഹർജി നൽകിയിരുന്നു.