വൈകി ഉറങ്ങുന്നവരുടെ ശ്രദ്ധയ്ക്ക്..! പ്രമേഹം പെട്ടന്ന് പിടികൂടും
രാത്രിയില്‍ വൈകി ഉറങ്ങുന്നതും രാവിലെ വൈകി എഴുന്നേല്‍ക്കുന്നതും പ്രമേഹത്തിലേക്ക് നയിക്കുന്നുവെന്ന് പഠനം. ഇത്തരം പ്രവണത പ്രമേഹരോഗ സാധ്യത 19 ശതമാനം വര്‍ധിപ്പിക്കുമെന്നാണ് പഠനം പറയുന്നത്. അമേരിക്കയിലെ ബ്രിങ്ഹാം ആന്‍ഡ്‌ വിമന്‍സ്‌ ഹോസ്‌പിറ്റലാണ്‌ ഇത്‌ സംബന്ധിച്ച പഠനം നസംഘടിപ്പിച്ചത്. അന്നല്‍സ്‌ ഓഫ്‌ ഇന്റേണല്‍ മെഡിസിന്‍ ജേണലില്‍ പഠനഫലം പ്രസിദ്ധീകരിച്ചു.
ശരിയായ ഉറക്ക ശീലങ്ങള്‍ ഇല്ലാത്തവര്‍ക്ക്‌ പ്രമേഹത്തിന്റെ മാത്രമല്ല ഹൃദ്രോഗത്തിന്റെയും സാധ്യത മറ്റുള്ളവരെ അപേക്ഷിച്ച്‌ കൂടുതലായിരിക്കുമെന്ന് ഗവേഷണ റിപ്പോര്‍ട്ട്‌ പറയുന്നു. 63676 നഴ്‌സുമാരില്‍ 2009-2017 കാലയളവിലാണ്‌ പഠനം സംഘടിപ്പിച്ചത്.
പഠനത്തില്‍ പങ്കെടുത്ത 11 ശതമാനം പേര്‍ തങ്ങള്‍ വൈകി ഉറങ്ങുന്നവരും വൈകി എഴുന്നേല്‍ക്കുന്നവരുമാണെന്ന്‌ വെളിപ്പെടുത്തി. 35 ശതമാനം പേര്‍ നേരത്തെ ഉറങ്ങി നേരത്തെ എഴുന്നേല്‍ക്കുന്ന വിഭാഗത്തിലും പെടുന്നു. ശേഷിക്കുന്നവര്‍ തങ്ങള്‍ ഈ രണ്ട്‌ വിഭാഗത്തിലും കൃത്യമായി പെടുന്നവരല്ലെന്നും രണ്ടിന്റെയും ഇടയിലുള്ള സമയമാണ്‌ പാലിക്കാറുള്ളതെന്നും വ്യക്തമാക്കി.
വൈകി ഉറങ്ങുന്ന 11 ശതമാനം പേരില്‍ പ്രമേഹ സാധ്യത മറ്റ്‌ രണ്ട്‌ സംഘങ്ങളെ അപേക്ഷിച്ച്‌ 19 ശതമാനം അധികമാണെന്ന്‌ ഗവേഷകര്‍ കണ്ടെത്തി. ഈ വിഭാഗത്തില്‍പ്പെടുന്നവര്‍ അമിതമായി മദ്യപിക്കാനും പുകവലിക്കാനും നിലവാരം കുറഞ്ഞ ഭക്ഷണം കഴിക്കാനും അലസമായ ജീവിതശൈലി നയിക്കാനും സാധ്യത കൂടുതലാണെന്നും ഗവേഷകര്‍ വ്യക്തമാക്കുന്നു.