സ്ത്രീവിരുദ്ധപരാമർശം: മൻസൂർ അലി ഖാനെതിരേ നടപടിയെടുക്കുമെന്ന് വനിതാ കമ്മിഷൻ

 

ചെന്നൈ: നടിമാരെയും ബലാത്സംഗരംഗങ്ങളെയും ബന്ധപ്പെടുത്തി നടൻ മൻസൂർ അലി ഖാൻ നടത്തിയ സ്ത്രീവിരുദ്ധപരാമർശത്തിൽ നടപടിയെടുക്കുമെന്ന് ദേശീയ വനിതാ കമ്മിഷൻ അംഗം ഖുശ്ബു സുന്ദർ പറഞ്ഞു. തമിഴ് ചലച്ചിത്രലോകത്തെ പ്രമുഖർ ഉൾപ്പടെ മൻസൂർ അലി ഖാനെതിരെ വിമർശനവുമായി രംഗത്തുവന്നിട്ടുണ്ട്.

വിജയ്‌യും തൃഷയും മുഖ്യവേഷങ്ങളിൽ എത്തിയ ‘ലിയോ’ എന്ന സിനിമയെക്കുറിച്ചുള്ള അഭിമുഖത്തിലായിരുന്നു മൻസൂർ അലി ഖാൻ വിവാദപരാമർശം നടത്തിയത്. തൃഷ, ഖുശ്ബു, റോജ എന്നിവരുടെ പേരെടുത്തുപറയുകയും ചെയ്തു. തൃഷ തന്നെയാണ് നടനെതിരേ ശക്തമായ ഭാഷയിൽ പ്രതികരിച്ചത്. ഇനിയൊരിക്കലും അയാളുടെകൂടെ അഭിനയിക്കില്ലെന്നും തൃഷ പറഞ്ഞു. ഇത്തരം വൃത്തികെട്ട മനോഭാവമുള്ളവരെ വെറുതേവിടാനാവില്ലെന്ന് ദേശീയ വനിതാ കമ്മിഷൻ അംഗമായ നടി ഖുശ്ബു പ്രതികരിച്ചു വനിതാ കമ്മിഷനിലെ മറ്റ് അംഗങ്ങളുമായി  ഈ വിഷയം ചർച്ചചെയ്തിട്ടുണ്ടെന്നും ഉടൻ നടപടിസ്വീകരിക്കുമെന്നും അവർ പറഞ്ഞു.