നടന്‍ അലന്‍സിയറിനെതിരേ വനിതാ കമീഷന്‍ സ്വമേധയാ കേസെടുത്തു
തിരുവനന്തപുരം: മാധ്യമപ്രവര്‍ത്തകയോട് അപമര്യാദയായി പെരുമാറിയ സംഭവത്തില്‍ നടന്‍ അലന്‍സിയറിനെതിരേ സ്വമേധയാ കേസെടുത്ത് സംസ്ഥാന വനിത കമീഷന്‍.
തിരുവനന്തപുരം റൂറല്‍ എസ്പി ഡി.ശില്‍പയോട് സംഭവം സംബന്ധിച്ച് റിപ്പോര്‍ട്ട് ആവശ്യപ്പെട്ടതായി വനിത കമീഷന്‍ അധ്യക്ഷ പി സതീദേവി പറഞ്ഞു. ചാനല്‍ പ്രവര്‍ത്തകയെ അവഹേളിച്ചു കൊണ്ടു സംസാരിച്ചതിനേതിരേ നല്‍കിയ പരാതിയില്‍ അലന്‍സിയറിനെതിരേ തിരുവനന്തപുരം റൂറല്‍ എസ്പി കേസ് രജിസ്റ്റര്‍ ചെയ്തിട്ടുണ്ട്.
സംസ്ഥാന ചലച്ചിത്ര അവാര്‍ഡ് വിതരണ ചടങ്ങില്‍ അലന്‍സിയര്‍ നടത്തിയ സ്ത്രീവിരുദ്ധ പരാമർശനത്തിന് വന്‍ വിമർശനം ഉയർന്നിരുന്നു. അവാര്‍ഡ് സ്വീകരിച്ച ശേഷം പുരസ്‌കാരമായി പെണ്‍പ്രതിമ നല്‍കി പ്രലോഭിപ്പിക്കരുതെന്നാണ് അലന്‍സിയര്‍ പറഞ്ഞത്. ഇതിന് പിന്നാലെ വിഷയത്തിൽ അലന്‍സിയറിന്‍റെ പ്രതികരണം എടുക്കാന്‍ പോയ ചാനല്‍ പ്രവര്‍ത്തകയ്‌ക്കെതിരേയാണ് അദ്ദേഹം മോശം പദപ്രയോഗം നടത്തിയത്.