കൊച്ചി: മുൻ തിരഞ്ഞെടുപ്പുകളിൽ കൃത്യമായി വോട്ട് രേഖപ്പെടുത്തി ശ്രദ്ധ നേടിയിരുന്ന മെഗാസ്റ്റാർ മമ്മൂട്ടിക്ക് ഇത്തവണ തദ്ദേശ സ്വയംഭരണ തിരഞ്ഞെടുപ്പിൽ വോട്ട് ചെയ്യാനാവില്ല. നടന്റെ പേര് വോട്ടർപട്ടികയിൽ ചേർത്തിട്ടില്ല എന്നാണ് വിവരം.(Mammootty will not be able to vote this time, his name is not in the voter list)
മമ്മൂട്ടിയുടെ വീട് കൊച്ചി നഗരസഭയിലെ 44-ാം ഡിവിഷനിലാണ് സ്ഥിതി ചെയ്യുന്നത്. കഴിഞ്ഞ ലോക്സഭാ തിരഞ്ഞെടുപ്പിൽ പൊന്നുരുന്നി സ്കൂളിലെ ബൂത്തിൽ മമ്മൂട്ടി വോട്ട് രേഖപ്പെടുത്തുന്ന ദൃശ്യങ്ങൾ വലിയ വാർത്താ പ്രാധാന്യം നേടിയിരുന്നു. വോട്ടർപട്ടികയിൽ പേര് ഇല്ലാത്തതിനാൽ ഈ പതിവ് ഇത്തവണ മുടങ്ങി.
മറ്റൊരു പ്രമുഖ താരവും കേന്ദ്രമന്ത്രിയുമായ സുരേഷ് ഗോപി എം.പി. അതിരാവിലെ തന്നെ വോട്ട് രേഖപ്പെടുത്തി. തിരുവനന്തപുരത്തെ ശാസ്തമംഗലം വാർഡിലെ ബൂത്ത് നമ്പർ മൂന്നിലാണ് അദ്ദേഹം വോട്ട് ചെയ്തത്. പാർലമെന്റ് സമ്മേളനം നടക്കുന്നതിനാൽ ഡൽഹിയിലേക്ക് പോകേണ്ടതുകൊണ്ടാണ് സുരേഷ് ഗോപി അതിരാവിലെ തന്നെ വോട്ട് രേഖപ്പെടുത്താൻ എത്തിയത്.