മയക്കുമരുന്ന് കേസില്‍ യുവാവിന് 10 വര്ഷം തടവുശിക്ഷ
Nov 19, 2023, 12:42 IST
പാലക്കാട്: 115 ഗ്രാം മെത്താംഫിറ്റാമിനുമായി പിടിയിലായ യുവാവിന് പത്ത് വര്ഷം കഠിന തടവ്. പട്ടാമ്പി സ്വദേശി സുഹൈല്‍ എന്ന യുവാവിനാണ് ശിക്ഷ വിധിച്ചത്. പാലക്കാട് രണ്ടാം അഡിഷണല്‍ സെഷന്‍സ് കോടതിയുടേതാണ് വിധി.
2021 മാര്‍ച്ച് 20നാണ് വാളയാര്‍ ടോള്‍ പ്ലാസക്ക് സമീപത്ത് നടന്ന പരിശോധനയില്‍ മെത്താംഫിറ്റാമിനുമായി ബസില്‍ നിന്ന് യുവാവിനെ പിടികൂടിയത്. പാലക്കാട് എക്‌സൈസ് റേഞ്ച് ഇന്‍സ്പെക്ടര്‍ ഒ വിനു, പാലക്കാട് സ്‌ക്വാഡ് എക്‌സൈസ് ഇന്‍സ്പെക്ടര്‍ കെ എസ് പ്രശോഭ് എന്നിവരുടെ നേതൃത്വത്തിലുള്ള സംഘമാണ് അറസ്റ്റ് രേഖപ്പെടുത്തിയത്. 10 വര്‍ഷത്തെ കഠിന തടവും ഒരു ലക്ഷം രൂപ പിഴയുമാണ് പ്രതിക്ക് ശിക്ഷ വിധിച്ചിരിക്കുന്നത്. പിഴ അടച്ചില്ലെങ്കില്‍ ഒരു വര്ഷം കൂടി തടവ് അനുഭവിക്കേണ്ടി വരും.
