ബഹ്റൈനില്‍ മലയാളിയെ കൊലപ്പെടുത്തിയ കേസില്‍ പ്രതിയായ സുഡാനി പൗരന് കോടതി വധശിക്ഷ വിധിച്ചു
മനാമ: ബഹ്റൈനില്‍ മലയാളിയെ കൊലപ്പെടുത്തിയ കേസില്‍ പ്രതിയായ സുഡാനി പൗരന് ബഹ്റൈന്‍ ഹൈക്രിമിനല്‍ കോടതി വധശിക്ഷ വിധിച്ചു. കോഴിക്കോട് താമരശേരി പരപ്പന്‍പൊയില്‍ ജിനാന്‍ തൊടിക ജെ.ടി. അബ്ദുല്ലക്കുട്ടിയുടെ മകന്‍ അബ്ദുല്‍ നഹാസ് (33) ആണ് 2018 ജൂലൈ മൂന്നിന് കൊല്ലപ്പെട്ടത്. ഹൂറ എക്സിബിഷന്‍ റോഡില്‍ അല്‍ അസൂമി മജ്ലിസിന് സമീപമുള്ള താമസ സ്ഥലത്ത് കൈകള്‍ കെട്ടി മര്‍ദ്ദനമേറ്റ നിലയിലും തലക്ക് ഗുരുതര പരിക്ക് പറ്റിയ അവസ്ഥയിലുമായിരുന്നു മൃതദേഹംകണ്ടെത്തിയത് .
തെളിവുകള്‍ നശിപ്പിക്കാനായി, നിലത്ത് മുളക്പൊടി വിതറിയിരുന്നതായും എണ്ണ ഒഴിച്ചിരുന്നതായും കണ്ടെത്തിയിരുന്നു. തുടര്‍ന്ന് നടന്ന അന്വേഷണത്തില്‍ സ്ഥലത്തെ സി.സി.ടി.വി ദൃശ്യങ്ങളില്‍ നിന്നും പ്രതിയുടെ ദൃശ്യം ലഭിക്കുകയും അറസ്റ്റ് നടക്കുകയുമായിരുന്നു.