ചാടിയത് ഭാര്യയെ കാണാൻ.! പൂജപ്പുര സെന്ട്രല് ജയിലില് നിന്ന് രക്ഷപ്പെട്ട കൊലക്കേസ് പ്രതി കോടതിയില് കീഴടങ്ങി
തിരുവനന്തപുരം: പൂജപ്പുര സെന്ട്രല് ജയിലില് നിന്ന് രക്ഷപ്പെട്ട കൊലക്കേസ് പ്രതി കോടതിയില് കീഴടങ്ങി. തമിഴ്നാട് തൂത്തുക്കുടി സ്വദേശി ജാഹിര് ഹുസൈൻ എന്ന 48 കാരണാണ് തിരുവനന്തപുരം അഡീഷണല് ചീഫ് ജുഡീഷ്യല് മജിസ്ട്രേറ്റ് കോടതിയില് കീഴടങ്ങിയത്. അതേസമയം, ഭാര്യയെ കാണാനായാണ് താന് ജയില് ചാടിയതെന്നാണ് പ്രതി കോടതിക്ക് മുൻപാകെ നൽകിയ മൊഴി. ഇയാൾക്കായുള്ള അന്വേഷണം പോലീസ് ഊർജ്ജിതമാക്കിയതിനിടെ ശനിയാഴ്ച ഉച്ചയോടെയാണ് ജാഹിര് ഹുസൈന് ഭാര്യയ്ക്കും മകനും ഒപ്പമെത്തി കോടതിയില് കീഴടങ്ങിയത്. സെപ്റ്റംബര് ഏഴിന് രാവിലെയാണ് കൊലക്കേസില് ജീവപര്യന്തം തടവിന് ശിക്ഷിക്കപ്പെട്ട ജാഹിര് ഹുസൈന് പൂജപ്പുര സെന്ട്രല് ജയിലില്നിന്ന് രക്ഷപ്പെട്ടത്. അലക്കുകേന്ദ്രത്തിലെ ജോലിക്കിടെ പോലീസുകാരനും മറ്റൊരു തടവുകാരനും ഭക്ഷണാശലയില് പോയ തക്കംനോക്കി ഇയാള് ജയില് ചാടുകയായിരുന്നു.