യുഎസ് പ്രസിഡന്റ് തെരഞ്ഞെടുപ്പില് ഇടപെടരുത്; പുടിന് ട്രംപിന്റെ താക്കീത്
ടോക്കിയോ: യുഎസ് പ്രസിഡന്റ് തെരഞ്ഞെടുപ്പില് അനാവശ്യ ഇടപെടല് നടത്തരുതെന്ന് റഷ്യന് പ്രസിഡന്റ് വ്ലാദിമിര് പുടിന് താക്കീത് നല്കി ഡൊണാള്ഡ് ട്രംപ്. ജപ്പാനിലെ ഒസാക്കയില് ജി20 ഉച്ചകോടിക്കിടെ ഇരുവരും മാധ്യമ പ്രവര്ത്തകരുടെ സാന്നിധ്യത്തില് ഫോട്ടോയ്ക്കു പോസ് ചെയ്യുകയായിരുന്നു. ഇതിനിടയില് യുഎസിലെ ജനാധിപത്യ പ്രക്രിയയില് ഇടപെടരുതെന്നു പുടിനോടു പറയുമോ എന്ന് മാധ്യമ പ്രവര്ത്തകര് ചോദിച്ചപ്പോളാണ് ട്രംപ് തെരഞ്ഞെടുപ്പില് ഇടപെട്ടേക്കരുതെന്നു പറഞ്ഞത്.
2016ലെ പ്രസിഡന്റ് തെരഞ്ഞെടുപ്പില് ട്രംപിന്റെ വിജയത്തിനായി റഷ്യ ഇടപെട്ടുവെന്ന ആരോപണം വലിയ വിവാദങ്ങള്ക്ക് വഴിയൊരുക്കിയിരുന്നു. അമേരിക്കയിലെ ഇന്റലിജന്സ് വൃത്തങ്ങളും ഇക്കാര്യം സ്ഥിരീകരിച്ചിരിന്നു. എന്നാല് ട്രംപ് റഷ്യക്കാരുമായി ഗൂഢാലോചന നടത്തിയതിനു തെളിവില്ലെന്ന റിപ്പോര്ട്ടാണ് അന്വേഷണസമിതി സമര്പ്പിച്ചത്. ഇതിനു ശേഷം ആദ്യമായിട്ടാണ് ട്രംപും പുടിനും തമ്മില് ജി 20 ഉച്ചകോടിയില് കൂടിക്കാഴ്ച്ച നടത്തിയത്.