ലൈംഗികത്തൊഴിലാളിയായ യുവതിയെ കൊന്ന് വെട്ടിനുറുക്കി, മൂന്ന് പെട്ടികളിലാക്കി ഉപേക്ഷിച്ചു; 40 കാരനായ കാമുകന്‍ അറസ്റ്റില്‍
പൂണെ: ലൈംഗികത്തൊഴിലാളിയായ യുവതിയെ കൊലപ്പെടുത്തി മൃതദേഹം വെട്ടിനുറുക്കി പെട്ടികളിലാക്കി മൂന്നിടങ്ങളിലായി ഉപേക്ഷിച്ച സംഭവത്തില്‍ പ്രതി അറസ്റ്റില്‍. പൂണെ ബുദ്വാര്‍പേട്ട് സ്വദേശിയായ 40-കാരനെയാണ് പോലീസ് അറസ്റ്റ് ചെയ്തത്. ഇയാള്‍ യുവതിയുടെ കാമുകനാണെന്നാണ് പോലീസ് പറഞ്ഞത്.ഇക്കഴിഞ്ഞ ഓഗസ്റ്റ് 12-ാം തീയതി മുതലാണ് ബുദ്വാര്‍പേട്ടിലെ ലൈംഗികത്തൊഴിലാളിയായ യുവതിയെ കാണാതായത്. തുടർന്ന് വേശ്യാലയ നടത്തിപ്പുകാരന്‍ പോലീസില്‍ പരാതി നല്‍കുകയായിരുന്നു. പരാതിയുടെ അടിസ്ഥാനത്തിൽ നടത്തിയ അന്വേഷണത്തിലാണ് യുവതി കൊല്ലപ്പെട്ടതാണെന്ന് കണ്ടെത്തിയത്. വിവാഹിതനായ പ്രതിയും യുവതിയും തമ്മില്‍ കഴിഞ്ഞ മൂന്നുമാസമായി പ്രണയത്തിലായിരുന്നു. ഇതിനിടെ 40-കാരന്‍ കാമുകിക്ക് വേണ്ടി നാരായണ്‍പേട്ടില്‍ വാടകയ്ക്ക് ഫ്‌ളാറ്റെടുത്ത് നല്‍കുകയും ചെയ്തു. എന്നാല്‍ ഓഗസ്റ്റ് 12-ാം തീയതി ഇരുവരും തമ്മില്‍ ഫ്‌ളാറ്റില്‍വെച്ച് വാക്കുതർക്കം ഉണ്ടാകുകയും പ്രതി യുവതിയെ കഴുത്ത് ഞെരിച്ച് കൊലപ്പെടുത്തുകയായിരുന്നു. പിന്നാലെ ഫ്‌ളാറ്റ് പുറത്തുനിന്ന് പൂട്ടി രക്ഷപ്പെടുകയും ചെയ്തു.
തുടർന്ന് ഒരു സുഹൃത്തിന്റെ സഹായത്തോടെ ഒരു ടെംപോ വാന്‍ സംഘടിപ്പിച്ച് ഓഗസ്റ്റ് 14-ന് നാരായണ്‍പേട്ടില്‍ തിരിച്ചെത്തി. തുടര്‍ന്ന് ഫ്‌ളാറ്റിനുള്ളില്‍വെച്ച് യുവതിയുടെ മൃതദേഹം വെട്ടിനുറുക്കി കഷണങ്ങളാക്കി മൂന്ന് പെട്ടികളിലാക്കുകയായിരുന്നു. ഈ പെട്ടികള്‍ പിന്നീട് മൂന്നിടത്തായി ഉപേക്ഷിക്കുകയും ചെയ്തു. സംഭവത്തില്‍ പ്രതി കുറ്റം സമ്മതിച്ചതായും മൃതദേഹാവശിഷ്ടങ്ങള്‍ ഉപേക്ഷിച്ചസ്ഥലങ്ങള്‍ കാണിച്ചുനല്‍കിയതായും പോലീസ് പറഞ്ഞു. ഡി.സി.പി(ക്രൈം) ശ്രീനിവാസ് ഗാഡ്‌ഗെ, എ.സി.പി. സുരേന്ദ്ര ദേശ്മുഖ് തുടങ്ങിയവരുടെ നേതൃത്വത്തിലുള്ള പോലീസ് സംഘമാണ് പ്രതിയെ പിടികൂടി തെളിവെടുപ്പ് നടത്തിയത്.