കൊല്ലത്ത് ലോറി ഡ്രൈവറെ കുത്തേറ്റ് മരിച്ച നിലയിൽ കണ്ടെത്തി; മൃതദേഹം കണ്ടെത്തിയത് നിർത്തിയിട്ടിരുന്ന ലോറിയുടെ ക്യാബിന് സമീപം
കൊല്ലം: ജില്ലയിലെ ആയൂരിൽ ലോറി ഡ്രൈവറെ കുത്തേറ്റ് മരിച്ച നിലയിൽ കണ്ടെത്തി. കുണ്ടറ കേരളപുരം സ്വദേശി അജയൻപിള്ള (56) ആണ് മരിച്ചത്. ഇന്ന് പുലർച്ചെ ആയൂരിൽ പാതയോരത്ത് നിർത്തിയിട്ടിരുന്ന ലോറിയുടെ ക്യാബിന് സമീപമാണ് അജയൻ പിള്ളയുടെ മൃതദേഹം കാണപ്പെട്ടത്. ശരീരത്തിൽ നിരവധി കുത്തേറ്റ പാടുകളുണ്ടായിരുന്നു. ചോരവാർന്നനിലയിലാണ് മൃതദേഹം കണ്ടെത്തിയത്. പരിസരവാസികൾ വിവരമറിയിച്ചതിനെതുടർന്ന് ചടയമംഗലം പോലീസെത്തി മൃതദേഹം ആശുപത്രിയിലേക്ക് മാറ്റി. മോഷ്ടാക്കൾ ലോറി ഡ്രൈവറെ അപായപ്പെടുത്തി പണം തട്ടാൻ ശ്രമിച്ചതാണോ എന്ന് പോലീസ് അന്വേഷിക്കുന്നു. സിസിടിവി ദൃശ്യങ്ങൾ പരിശോധിച്ചുവരികയാണെന്ന് ചടയമംഗലം പോലീസ് പറഞ്ഞു.