കരിപ്പൂർ സ്വർണക്കടത്ത്: ഒരാൾ കൂടി അറസ്റ്റിൽ; പിടിയിലായത് അർജുൻ ആയങ്കിയെ സഹായിച്ച അജ്മൽ
കൊച്ചി: കരിപ്പൂർ സ്വർണക്കടത്ത് കേസുമായി ബന്ധപ്പെട്ട ഒരാൾ കൂടി അറസ്റ്റിലായി. കേസിലെ മുഖ്യ പ്രതി അർജുൻ ആയങ്കിയെ സഹായിച്ച പാനൂർ സ്വദേശി അജ്മൽ ആണ് അറസ്റ്റിലായത്.അർജുൻ ആയങ്കിക്കു സിംകാർഡ് എടുത്തുകൊടുത്തത് അജ്മലായിരുന്നു. അമ്മ സക്കീനയുടെ പേരിലാണ് സിംകാർഡ് എടുത്തത്. സക്കീനയേയും കസ്റ്റംസ് ചോദ്യം ചെയ്തിരുന്നു. കൊച്ചി കസ്റ്റംസ് പ്രിവന്റീവ് കമ്മിഷണറേറ്റിൽ ഒൻപത് മണിക്കൂർ നീണ്ട ചോദ്യം ചെയ്യലിനു ശേഷമാണ് അജ്മലിന്റെ അറസ്റ്റ് രേഖപ്പെടുത്തിയത്. അതേസമയം, അജ്മലിനൊപ്പം ചോദ്യം ചെയ്ത ടിപി കേസ് പ്രതി മുഹമ്മദ് ഷാഫിയേയും സുഹൃത്ത് ആഷിഖിനെയും വിട്ടയച്ചു. ഷാഫിയെ ചോദ്യം ചെയ്യാൻ വീണ്ടും വിളിപ്പിക്കും എന്നാണ് റിപ്പോർട്ട്.