കൊല്ലത്ത് യുവാവിനെ കുത്തിക്കൊലപ്പെടുത്തി; ഇറച്ചിവെട്ടുകാരനായ പ്രതിക്കായി തിരച്ചിൽ
കൊല്ലം: പള്ളിക്കാവിൽ യുവാവിനെ കുത്തി കൊലപ്പെടുത്തി. ഓഞ്ചേഴുത്ത് കാവിന് സമീപം താമസിക്കുന്ന വിഷ്ണുവാണ് (29) കുത്തേറ്റ് മരിച്ചത്. പള്ളിക്കാവിൽ താമസിക്കുന്ന തമിഴ്‌നാട് സ്വദേശിയും കാവനാട് മാർക്കറ്റിൽ ഇറച്ചിവെട്ടുകാരനുമായ പ്രകാശ് ആണ് വിഷ്ണുവിനെ കുത്തിക്കൊലപ്പെടുത്തിയത്. ഇന്ന് രാവിലെ വിഷ്ണുവും പ്രകാശും തമ്മിൽ പള്ളിക്കാവ് കരിമ്പോലിൽകുളത്തിന് സമീപം വെച്ച് വാക്ക് തർക്കവും തുടർന്ന് സോഡാ കുപ്പി കൊണ്ട് അടിപിടിയും നടന്നിരുന്നതായി നാട്ടുകാർ പറയുന്നു. ഇരുവരും പിരിഞ്ഞ് പോയ ശേഷം പ്രകാശ് വീട്ടിലെത്തി ഇറച്ചി വെട്ടാൻ ഉപയോഗിക്കുന്ന കത്തിയുമായി ജവാൻ മുക്കിന് സമീപം നിന്ന വിഷ്ണുവിനെ നെഞ്ചത്ത് വെട്ടി പരിക്കേൽപ്പിക്കുകയായിരുന്നു എന്നാണു റിപ്പോർട്ട്. പ്രതി പ്രകാശ് സംഭവസ്ഥലത്ത് നിന്നും രക്ഷപ്പെട്ടു.കുത്തേറ്റ് വിഷ്ണു റോഡിൽ കിടന്നെങ്കിലും ശക്തികുളങ്ങര പൊലീസെത്തിയാണ് ജില്ല ആശുപത്രിയിലേക്ക് കൊണ്ട് പോയത്. ആശുപത്രിയിൽ എത്തിച്ചെങ്കിലും രക്ഷിക്കാനായില്ല. പ്രതിക്കായി പൊലീസ് തിരച്ചിൽ ആരംഭിച്ചു.
