കണക്കിലെ ഗുണനപ്പട്ടികക്ക് വൈവാഹിക ജീവിതത്തിൽ വല്ല റോളും ഉണ്ടോ?; വരന് രണ്ടിന്റെ ഗുണനപ്പട്ടിക അറിയില്ല; വധു മണ്ഡപത്തിൽ നിന്ന് ഇറങ്ങിപ്പോയി
മഹോബ: വിവാഹദിവസം വരന്റെ വിദ്യാഭ്യാസ യോഗ്യതയിൽ സംശയം തോന്നിയ പ്രതിശ്രുത വധു ലളിതമായ ഒരു ചോദ്യം മുന്നോട്ടു വച്ചു. രണ്ടിന്റെ ഗുണനപ്പട്ടിക ചൊല്ലാനായിരുന്നു വധുവിന്റെ ആവശ്യം. എന്നാൽ വരന് ഗുണനപ്പട്ടിക അറിയാത്തതിനാൽ പെൺകുട്ടി മണ്ഡപത്തിൽ നിന്ന് ഇറങ്ങിപോകുകയായിരുന്നു. ഗണിതത്തിന്റെ ബാലപാഠങ്ങൾ പോലും അറിയാത്ത ഒരാളെ തനിക്ക് ജീവിതപങ്കാളിയായി വേണ്ടെന്ന് പറഞ്ഞായിരുന്നു പെൺകുട്ടി വിവാഹം വേണ്ടെന്ന് വെച്ച് മണ്ഡപത്തിൽ നിന്ന് ഇറങ്ങി പോയത്. കുടുംബാംഗങ്ങളും സുഹൃത്തുക്കളും പെൺകുട്ടിയെ പിന്തിരിപ്പിക്കാൻ ശ്രമിച്ചെങ്കിലും പെൺകുട്ടി ഉറച്ച തീരുമാനത്തിലായിരുന്നു. വരന്റെ കുടുംബം അയാളുടെ വിദ്യാഭ്യാസ യോഗ്യത മറച്ചുവെച്ച് പെൺകുട്ടിയുടെ കുടുംബത്തെ പറ്റിച്ചുവെന്നും വധുവിന്റെ ബന്ധുവായ പെൺകുട്ടി പറഞ്ഞു. അതേസമയം, ഇരു കുടുംബങ്ങളും പരസ്പരം നൽകിയ ആഭരണങ്ങളും സമ്മാനങ്ങളും തിരികെ നൽകാമെന്ന വ്യവസ്ഥയിൽ വിഷയം ഒത്തുതീർപ്പാക്കിയതിനാൽ പൊലീസ് കേസ് രജിസ്റ്റർ ചെയ്തില്ല.