രാഷ്ട്രീയ സംഘർഷം : അമിത് ഷായുമായി ബംഗാൾ ഗവർണർ കൂടിക്കാഴ്ച നടത്തി
ന്യൂഡൽഹി: ബിജെപി -തൃണമൂൽ രാഷ്ട്രീയ സംഘർഷങ്ങൾ തുടരുന്ന പശ്ചാത്തലത്തിൽ കേന്ദ്ര ആഭ്യന്തര മന്ത്രി അമിത് ഷായുമായി പശ്ചിമ ബംഗാൾ ഗവർണർ കേസരിനാഥ് ത്രിപാഠി കൂടിക്കാഴ്ച നടത്തി.
പശ്ചിമ ബംഗാളിലെ രാഷ്ട്രീയ സംഘർഷങ്ങളിൽ കേന്ദ്ര ആഭ്യന്തരമന്ത്രി സംസ്ഥാന സർക്കാറിനോട് കഴിഞ്ഞ ദിവസം റിപ്പോർട്ട് തേടിയിരുന്നു. സ്ഥിതിഗതികൾ നിയന്ത്രണവിധേയമെന്നും അക്രമം നടത്തിയവർക്കെതിരെ കർശന നിലപാട് സ്വീകരിച്ചതായും ചീഫ് സെക്രട്ടറിയുടെ റിപ്പോർട്ടിൽ വ്യക്തമാക്കുന്നു.
ബിജെപി -തൃണമൂൽ സംഘർഷത്തിനിടെ ഒരു തൃണമൂൽ പ്രവർത്തകനും രണ്ടു ബി.ജെ.പി പ്രവർത്തകരുമാണ് കൊല്ലപ്പെട്ടത്. മൂന്നുപേർക്ക് ഗുരുതര പരിക്കേറ്റതായി റിപ്പോർട്ടുണ്ട്. പൊതുസ്ഥലത്തുനിന്ന് പാർട്ടി പതാകകൾ നീക്കം ചെയ്യുന്നതിനെ ചൊല്ലിയുണ്ടായ സംഘർഷമാണ് അക്രമത്തിൽ കലാശിച്ചത്. ഒരു പ്രവർത്തകൻ കൂടി കൊല്ലപ്പെട്ടതായും അഞ്ചുപേരെ കാണാതായെന്നും ബി.ജെ.പി നേതാക്കൾ ആരോപിച്ചു.