വിനോദസഞ്ചാരത്തിനായി വാടകയ്‌ക്കെടുത്തത് ‘കെ .എസ്.ആർ.ടി.സി’ ബസ് ;പെൺകുട്ടികൾ ഉൾപ്പെടെയുള്ളവർ ഇരുന്നത് ബസിന് മുകളിൽ; ആനവണ്ടി ഫാൻസിന്‍റെ ഉല്ലാസയാത്ര വിവാദത്തിൽ
സുൽത്താൻ ബത്തേരി: വിനോദസഞ്ചാരത്തിനായി കെ .എസ്.ആർ.ടി.സി ബസ് വാടകക്കെടുത്ത് കേന്ദ്രങ്ങൾ കറങ്ങിയുള്ള ആനവണ്ടി ഫാൻസിെൻറ യാത്ര വിവാദത്തിലായി . ഇവർ ബസിനു മുകളിൽ കയറിയിരിക്കുന്ന ചിത്രങ്ങൾ ഉൾപ്പെടെ സമൂഹ മാധ്യമങ്ങളിൽ വൈറലായിരുന്നു .തുടർന്നാണ് സുൽത്താൻ ബത്തേരി ഡിപ്പോ പ്രതിക്കൂട്ടിലായത്. ഡിപ്പോക്ക് നാണക്കേടുണ്ടാക്കുന്ന രീതിയിലുള്ള പ്രവർത്തികൾക്കെതിരെ ജീവനക്കാരും രംഗത്തെത്തിയിരുന്നു .
ജില്ലക്ക് പുറത്തുനിന്നുള്ള ഓൺലൈൻ കൂട്ടായ്മയാണ് കഴിഞ്ഞദിവസം സുൽത്താൻ ബത്തേരി ഡിപ്പോയിലെത്തി രണ്ട് ബസുകൾ വാടകക്കെടുത്തത്. ഇവർ മുത്തങ്ങ, കാരാപ്പുഴ തുടങ്ങിയ വിനോദസഞ്ചാര കേന്ദ്രങ്ങളിലൂടെയായിരുന്നു യാത്ര ചെയ്തത് .
അതെസമയം കാരാപ്പുഴയിൽ ബസിനു മുകളിൽ കയറിയിരുന്നുള്ള സാഹസിക പ്രകടനങ്ങൾ നടത്തിയ ഇവർ തലനാരിഴക്കാണ് അപകടങ്ങളിൽ നിന്നും ഒഴിവായത്. പെൺകുട്ടികൾ ഉൾപ്പെടെയുള്ളവർ ബസിനു മുകളിൽ കയറി ഇരുന്നു . മുകളിലെ വൈദ്യുതി ലൈൻ ഗൗനിക്കാതെയായിരുന്നു ഇവരുടെ ഉല്ലാസയാത്ര . അതേസമയം പിറകിലെ ടൂറിസ്റ്റ് ബസിൽ ഉണ്ടായിരുന്നവർ രഹസ്യമായി ഇത് മൊബൈൽ കാമറയിൽ പകർത്തുകയായിരുന്നു. ഇത് ടൂറിസ്റ്റ് ബസുകാർ അവരുടെ ഫേസ് ബുക്ക് പേജിൽ പോസ്റ്റ് ചെയ്യുകയും ചെയ്തു .ഇതോടെയാണ് യാത്ര വിവാദമായത്.