സ്ഥാനാർത്ഥിയുടെ പോസ്റ്ററുകൾ ആക്രിക്കടയിൽ കണ്ടെത്തിയ സംഭവം; അട്ടിമറി സംശയിക്കുന്നു, സമിതി അന്വേഷിക്കുമെന്ന് മുല്ലപ്പള്ളി രാമചന്ദ്രൻ
തിരുവനന്തപുരം: നിയമസഭാ തെരഞ്ഞെടുപ്പിൽ വട്ടിയൂർക്കാവ് മണ്ഡലത്തിലെ യുഡിഎഫ് സ്ഥാനാർഥി വീണ നായരുടെ പോസ്റ്ററുകൾ ആക്രിക്കടയിൽ കണ്ടെത്തിയ സംഭവത്തിൽ അട്ടിമറി സംശയമുണ്ടെന്ന് കെപിസിസി അധ്യക്ഷൻ മുല്ലപ്പള്ളി രാമചന്ദ്രൻ. തിരുവനന്തപുരത്ത് മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.മുതിർന്ന നേതാക്കളുടെ അസാന്നിധ്യം മണ്ഡലത്തിലുണ്ടായിരുന്നെന്നും, ഉപതെരഞ്ഞെടുപ്പിന് സമാനമായ രീതിയിൽ പ്രചരണത്തിൽ വീഴ്ചയുണ്ടായോ എന്ന് പരിശോധിക്കുമെന്നും അദ്ദേഹം പറഞ്ഞു. ഇതിനായി കെപിസിസി മൂന്നംഗ സമിതിയെ നിയോഗിച്ചിട്ടുണ്ട്. മുതിർന്ന കെപിസിസി അംഗം ജോണ്സണ് എബ്രഹാം അധ്യക്ഷനായ സമിതിയാണ് അന്വേഷണം നടത്തുകയെന്നും അദ്ദേഹം പറഞ്ഞു.പോസ്റ്റർ ആക്രിക്കടയിൽ വിറ്റ മണ്ഡലം ട്രഷററെ കോണ്ഗ്രസിൽ നിന്നും പുറത്താക്കിയിരുന്നു. സംഭവത്തിൽ കെപിസിസി അന്വേഷണം നടത്തണമെന്ന് സ്ഥാനാർഥി വീണയും ആവശ്യപ്പെട്ടിരുന്നു.