പിതാവ് കാര് പൂട്ടിപ്പോയി; പൊരിവെയിലില് കാറിനുള്ളില് അകപ്പെട്ട കുഞ്ഞിനെ നാട്ടുകാര് ഗ്ലാസ് തകര്ത്ത് രക്ഷപ്പെടുത്തി
കൊല്ലം: കുണ്ടറയില് കാറിനുള്ളില് അകപ്പെട്ട രണ്ടു വയസുകാരനെ നാട്ടുകാര് ഗ്ലാസ് തകര്ത്ത് രക്ഷപ്പെടുത്തി. കുട്ടിയെ കാറിനുള്ളിലിരുത്തി പിതാവ് കാര് പൂട്ടി പോകുകയായിരുന്നു. വെള്ളിയാഴ്ച ഉച്ചയോടെ കുണ്ടറ ആശുപത്രിമുക്കിലാണ് സംഭവം.കാറിനുള്ളില് അകപ്പെട്ട കുട്ടി പൊരിവെയിലില് വിയര്ത്ത് കുളിച്ച് അസ്വസ്ഥതകള് പ്രകടിപ്പിക്കുകയായിരുന്നു. സംഭവം ശ്രദ്ധയില്പ്പെട്ട പ്രദേശവാസികളാണ് കാറിന്റെ ഗ്ലാസ് തകര്ത്ത് കുട്ടിയെ പുറത്തെത്തിച്ചത്.പുനുക്കുന്നൂര് കന്യാകുഴി സ്വദേശിയാണ് കുഞ്ഞിനെ കാറിലിരുത്തി പോയത്. അതേസമയം,ഒരു മണിക്കൂറിന് ശേഷം എത്തിയ പിതാവ് കുഞ്ഞിനെ രക്ഷിച്ചവരോട് തട്ടിക്കയറി. തുടര്ന്ന് നാട്ടുകാര് പോലീസിനെ വിളിച്ചു വരുത്തി. പിതാവിനെ കസ്റ്റഡിയിലെടുത്ത പോലീസ് കുട്ടിയെ ബന്ധുക്കള്ക്ക് കൈമാറി.