ഐപിഎൽ ഏപ്രിൽ 9ന് ആരംഭിക്കും; മേയ് 30ന് ഫൈനൽ; മത്സരങ്ങളെല്ലാം അടച്ചിട്ട സ്റ്റേഡിയത്തിൽ
മുംബൈ: ഐപിഎൽ പുതിയ സീസൺ ഏപ്രിൽ ഒൻപതിന് തുടക്കമാകും. ബിസിസിഐ ആണ് തീയതി പ്രഖ്യാപിച്ചത്. മുംബൈ ഇന്ത്യൻസും റോയൽ ചലഞ്ചേഴ്സ് ബംഗളൂരും ആണ് ഉദ്ഘാടന മത്സരത്തിൽ ഏറ്റുമുട്ടുക. അതേസമയം, കോവിടിന്റെ പശ്ചാത്തലത്തിൽ മത്സരങ്ങളെല്ലാം അടച്ചിട്ട സ്റ്റേഡിയത്തിലാവും നടക്കുകയെന്നും കാണികളെ അനുവദിക്കുന്ന കാര്യം പിന്നീട് തീരുമാനിക്കുമെന്നും ബിസിസിഐ അധികൃതർ അറിയിച്ചു. അഹമ്മദാബാദ്, ബംഗളൂരു, ചെന്നൈ, ഡൽഹി, മുംബൈ, കോൽക്കത്ത എന്നീ ആറ് വേദികളിലാണ് മത്സരങ്ങൾ അരങ്ങേറുന്നത്. ടീമുകളുടെ സ്വന്തം സ്റ്റേഡിയത്തിൽ മത്സരങ്ങൾ ഉണ്ടാകില്ല. മേയ് 30ന് അഹമ്മദാബാദിൽ വച്ചാണ് ഫൈനൽ പോരാട്ടം നടക്കുക. പ്ലേ ഓഫ് മത്സരങ്ങൾ മേയ് 25, 26, 28 തീയതികളിൽ നടക്കും. ഓരോ ടീമും നാല് വേദികളിൽ കളിക്കും. 56 ലീഗ് മത്സരങ്ങളിൽ ചെന്നൈ, മുംബൈ, കോൽക്കത്ത, ബംഗളൂരു എന്നിവിടങ്ങളിൽ പത്ത് വീതം മത്സരങ്ങൾ നടക്കുന്പോൾ ഡൽഹിയിലും അഹമ്മദാബാദിലും എട്ട് വീതം മത്സരങ്ങൾ നടക്കും.