ചരിത്രത്തിലിതാദ്യം, ആറ്റുകാല്‍ പൊങ്കാല ഇന്ന് ; ഭക്തര്‍ക്ക് സ്വന്തം വീടുകളില്‍ പൊങ്കാല അര്‍പ്പിക്കാം
തിരുവനന്തപുരം: ആറ്റുകാല്‍ ഭഗവതി ക്ഷേത്രത്തിലെ പൊങ്കാല ഇന്ന് 10.20ന് നടക്കും. കോവിഡിന്റെ സാഹചര്യത്തില്‍ ഇക്കുറി പൊങ്കാല ക്ഷേത്രച്ചടങ്ങുകളില്‍ മാത്രമായി ചുരുക്കിയിട്ടുണ്ട്. ഭക്തര്‍ക്ക് സ്വന്തം വീടുകളില്‍ പൊങ്കാല അര്‍പ്പിക്കാം.ക്ഷേത്രത്തിലെ പണ്ടാര അടുപ്പില്‍ മാത്രമാണ് പൊങ്കാല.ക്ഷേത്രത്തില്‍ പൊങ്കാല നടക്കുന്ന സമയത്ത് വീടുകളില്‍ പതിവുള്ള രീതിയില്‍ പൊങ്കാല തുടങ്ങുകയും നിവേദിക്കുകയും ചെയ്യാം. പതിവുപോലെയുള്ള സമൂഹ പൊങ്കാല അനുവദിക്കില്ലെന്ന് പൊലീസും ജില്ല ഭരണകൂടവും വ്യക്തമാക്കിയിട്ടുണ്ട്.
രാവിലെ 10.20ന് ശുദ്ധപുണ്യാഹത്തോടെ ചടങ്ങുകള്‍ ആരംഭിക്കും. 10.50 ന് തന്ത്രി തെക്കേടത്ത് കുഴിക്കാട്ടില്ലത്ത് പരമേശ്വരന്‍ വാസുദേവന്‍ ഭട്ടതിരിപ്പാട് ശ്രീകോവിലില്‍നിന്ന് ദീപം പകര്‍ന്ന് മേല്‍ശാന്തി പി. ഈശ്വരന്‍ നമ്ബൂതിരിക്ക് കൈമാറും. ക്ഷേത്ര തിടപ്പള്ളിയിലെയും വലിയ തിടപ്പള്ളിയിലെയും പൊങ്കാല അടുപ്പുകളില്‍ പകര്‍ന്ന ശേഷം അഗ്നി സഹമേല്‍ശാന്തിക്ക് കൈമാറും.വൈകീട്ട് 3.40ന് ഉച്ചപൂജക്ക് ശേഷം പൊങ്കാല നിവേദ്യ ചടങ്ങ് നടക്കും.