സിനിമാ സെറ്റ് കത്തിനശിച്ച സംഭവം; അന്വേഷണത്തിന് പ്രത്യേക സംഘം
ആലുവ: സിനിമാ സെറ്റ് കത്തിനശിച്ച സംഭവത്തിൽ അന്വേഷണത്തിന് പ്രത്യേക പോലീസ് സംഘം രൂപീകരിച്ചു.റൂറൽ ജില്ലാ പോലിസ് മേധാവി കെ. കാർത്തിക് ആണ് ഇക്കാര്യം അറിയിച്ചത്. ശനിയാഴ്ച്ച വൈകിട്ട് നടന്ന സംഭവത്തിൽ പുത്തൻ കുരിശ് ഡിവൈഎസ്പി അജയ് നാഥിന്റെ നേതൃത്വത്തിലാണ് അന്വേഷണം നടത്തുക. കത്തിപ്പോയ സെറ്റ് പ്രത്യേക അന്വേഷണ സംഘം സന്ദർശിച്ചു. യുവ സംവിധായകനായ എൽദോ ജോർജ് സംവിധാനം ചെയ്യുന്ന “മരണ വീട്ടിലെ തൂണ്’ എന്ന സിനിമയുടെ സെറ്റ് ആണ് കത്തിനശിച്ചത്. സംഭവസ്ഥലത്ത് ശാസ്ത്രീയ പരിശോധന നടത്തും. പോലിസ് നിരീക്ഷണവും ഏർപ്പെടുത്തിയിട്ടുണ്ട്. സംഭവത്തെക്കുറിച്ച് സമഗ്രമായി അന്വേഷിക്കുമെന്ന് എസ്പി കെ. കാർത്തിക് പറഞ്ഞു.