ഐപിഎൽ താരലേലം: മലയാളികള് ഏറെ ആകാംക്ഷയോടെ ഉറ്റുനോക്കിയ മുഹമ്മദ് അസ്ഹറുദ്ദീനെ റോയൽ ചലഞ്ചേഴ്സ് ബാംഗ്ലൂർ സ്വന്തമാക്കി
ചെന്നൈ: ഇക്കൊല്ലത്തെ ഐപിഎൽ താരലേലം ചെന്നൈയിൽ പുരോഗമിക്കുന്നു. ഇതിനിടെ മലയാളികള് ഏറെ ആകാംക്ഷയോടെ ഉറ്റുനോക്കിയ യുവതാരം മുഹമ്മദ് അസ്ഹറുദ്ദീനെ റോയൽ ചലഞ്ചേഴ്സ് ബാംഗ്ലൂർ സ്വന്തമാക്കി. അടിസ്ഥാന വിലയായ 20 ലക്ഷം രൂപയ്ക്കാണ് താരത്തെ ആർസിബി സ്വന്തമാക്കിയത്. വിക്കറ്റ് കീപ്പർ ബാറ്റ്സ്മാൻ മുഹമ്മദ് അസ്ഹറുദ്ദീനുവേണ്ടി ബാംഗ്ലൂര് ഒഴികെ മറ്റു ടീമുകളൊന്നും രംഗത്തെത്തിയില്ല. മുഷ്താഖ് അലി ട്രോഫി ട്വന്റി-20 ടൂര്ണമെന്റില് മുംബൈക്കെതിരെ നടത്തിയ വെടിക്കെട്ട് ബാറ്റിംഗാണ് അസ്ഹറുദ്ദീനെ ദേശീയ ശ്രദ്ധയിലെത്തിച്ചത്. മത്സരത്തിൽ 37 പന്തില് സെഞ്ചുറി നേടിയ അസ്ഹറുദ്ദീന് 54 പന്തില് 11 സിക്സും ഒമ്പത് ഫോറും അടക്കം 137 റണ്സെടുത്ത് പുറത്താകാതെ നിന്നു.