ഡൽഹി സ്ഫോടനം; ഉപയോഗിച്ചത് ഉഗ്രശേഷിയുള്ള സ്ഫോടക വസ്തു; ഭീകരസംഘടനകൾ ഉപയോഗിക്കുന്ന സ്ഫോടക വസ്തു എന്ന് അന്വേഷണസംഘം
ന്യൂഡൽഹി: വെള്ളിയാഴ്ച ഡൽഹിയിലെ ഇസ്രയേൽ എംബസിക്ക് സമീപമുണ്ടായ സ്ഫോടനത്തിന് ഉപയോഗിച്ച സ്ഫോടക വസ്തു തിരിച്ചറിഞ്ഞു. പിഇടിഎൻ (പെന്റാഎറിത്രിറ്റോൾ ടെട്രാനൈട്രേറ്റ്) എന്ന സ്ഫോടക വസ്തുവാണ് സ്ഫോടനത്തിനു ഉപയോഗിച്ചതെന്നാണ് കേസ് അന്വേഷിച്ച പ്രത്യേക അന്വേഷണ സംഘം കണ്ടെത്തിയത്. ഒൻപത് വാട്ട് ഹൈവാട്ട് ബാറ്ററിയും സംഭവ സ്ഥലത്ത് നിന്നും കണ്ടെടുത്തു. പകുതി കരിഞ്ഞ നിലയിൽ പിങ്ക് നിറത്തിലുള്ള സ്കാർഫും ഇസ്രയേൽ അംബാസിഡർക്കെന്ന പേരിലുള്ള വിലാസം എഴുതിയ കവറും സംഭവ സ്ഥലത്തു നിന്നും ലഭിച്ചിരുന്നു. അൽഖ്വയ്ദ ഉൾപ്പടെയുള്ള ഭീകരസംഘടനകൾ ഉപയോഗിച്ചിട്ടുള്ള സ്ഫോടക വസ്തുവാണിതെന്നാണ് അന്വേഷണസംഘം നൽകുന്ന സൂചന. സംഭവത്തിൽ ഐഎസ്, അൽഖ്വയ്ദ ബന്ധവും അന്വേഷണ സംഘം അന്വേഷിക്കുന്നുണ്ട്.