ഗാസിപുരിൽ നിന്നും ഒഴിയണമെന്ന് പോലീസ്, പോകില്ലെന്നും, വെടിവച്ചു കൊന്നോളൂ എന്നും കര്‍ഷകര്‍, പ്രദേശത്ത് സംഘർഷാവസ്ഥ
ന്യൂഡൽഹി: കേന്ദ്രസർക്കാറിന്‍റെ കാർഷിക നിയമങ്ങൾക്കെതിരായ കർഷകർ നടത്തുന്ന പ്രക്ഷോഭം അവസാനിപ്പിച്ച് ഗാസിപുർ റോഡുകൾ ഒഴിയണമെന്ന് ജില്ല ഭരണകൂടത്തിന്റെ നിർദ്ദേശം. ഡൽഹി -ഉത്തർപ്രദേശ് അതിർത്തിയായ ഗാസിപുരിൽ പ്രതിഷേധിക്കുന്ന കർഷകർക്കാണ് ഗാസിയബാദ് നിർദേശം നൽകിയിരിക്കുന്നത്. ഇന്ന് രാത്രി തന്നെ ഒഴിയണം എന്നാണു ഭരണകൂടം അറിയിച്ചിരിക്കുന്നത്. നവംബർ 26ന് കർഷകർ പ്രതിഷേധം ആരംഭിച്ചതുമുതൽ ഗാസിപൂർ അതിർത്തി അടച്ചിട്ടിരിക്കുകയാണ്.പ്രക്ഷോഭം കർഷകർ ശക്തമാക്കിയതോടെ പ്രദേശത്തെ വൈദ്യുത ബന്ധവും ജല വിതരണവും ഭരണകൂടം നേരത്തെ നിർത്തിവെച്ചിരുന്നു. ഇതിനു പിന്നാലെയാണ് ഒഴുഞ്ഞു പോകാനുള്ള നിർദ്ദേശം നൽകിയിരിക്കുന്നത്.ഇതിനിടെ കർഷകർ ഒഴിഞ്ഞു പോകണം എന്ന ആവശ്യവുമായിപൊലീസ് സമരവേദിയിലെത്തിയതോടെ സ്ഥലത്ത് സംഘർഷാവസ്ഥ നിലനിൽക്കുന്നതായാണ് വിവരം.
